#euskaraldia izango da VI. Ika Mizkaren ardatz nagusia

Ezkerretik eskuinera, Zuriñe Maguregi, Jon Zarate, Idoia Peñakoba, Jose Antonio Rodriguez Ranz eta Mikel Irizar./
Ezkerretik eskuinera, Zuriñe Maguregi, Jon Zarate, Idoia Peñakoba, Jose Antonio Rodriguez Ranz eta Mikel Irizar.

Euskararen erabilera aktibatzea xede duen ekimenaren bat eginik, sare sozialetan erronka zabalduko da abenduaren 1etik 3ra

Seigarren ediziora iritsiko da aurten Topaguneak eta EAEko hiru unibertsitateek abian jarritako 'Ika Mizka. Eta hik nola bizi dunk euskara? Aska ezank korapiloa!' egitasmoa. Sorreratik euskararen erabileraren inguruko hausnarketa egitea izan duenez helburu, eta edizio bakoitzean hausnarketa hori arlo desberdinetako gaiekin lotu duenez, puri-purian dagoen bat aukeratu dute aurtengorako: euskaldunek aktibazioan eragin nahi duen #euskaraldia ekimena.

Jakina denez, azken urteotan euskalgintzak egin dituen aktibazio jardueratatik abiatuta, Eusko Jaurlaritzak eta Euskaltzaleen Topaguneak jarri dute elkarrekin abian 2018an gauzatuko den Euskaraldia ekimena. Herritarrak aktibatzera animatuko dituzte, erronka baten bitartez: Euskal Herriko herri guztietan 11 egunez euskaraz bizitzeko ahalegina egin nahi da, hain zuzen, 2018ko azaroaren 23tik abenduaren 3ra.

Urtebete itxaron gabe, Ika Mizkak aurrea hartuko dio 2018rako proposatutako egitasmoari, eta sareetan zabalduko du erronka, abenduaren 1etik 3ra. #IkaMizka eta #euskaraldia traolak erabiliz, datozen egunotan sarea euskaraz bete nahi dute, alegia.

Aurkezpenean, Gipuzkoako Foru Aldundiko Hizkuntza Berdintasuneko zuzendari nagusi Mikel Irizarrekin batera izan dira Zuriñe Maguregi Gaztezukoko zuzendaria, Jon Zarate (Universidad del País Vasco/Euskal Herriko Unibertsitatea UPV/EHU), Idoia Peñakoba (MONDRAGON UNIBERTSITATEA) eta Jose Antonio Rodriguez Ranz (Deustuko Unibertsitatea).

"Gazteak dira euskararen etorkizuna, horregatik, gizartearen sektore hau aktibatzea oso garrantzitsua da euskararen transmisioa bermatzeko eta hizkuntza sendo eta bizia lortzeko", adierazi dute. Horregatik, ostegun honetan zabaldu den erronkari esker, "datozen egunotan gazteek euskaraz beteko dituzte sareak, datorren urteko lanaren erakusleiho bihurtuz".

Elkarlanaren garrantzia

Mikel Irizar Gipuzkoako Foru Aldundiko Hizkuntza Berdintasuneko zuzendaria pozik azaldu da ekimenarekin, izan ere legealdi hasieran aurkeztutako lan ildo nagusiek bat egiten baitute Ika Mizka honetan: gizartea, eta gazteak bereziki, euskararen inguruan aktibatzea; lurraldeko gizarte eragileekin, GAZTEZULO kasu honetan, elkarlanerako bideak egitea eta, azkenik, Gipuzkoako unibertsitateekin batera euskararen erabileran zentratutako ekimenak garatzea.

Jon Zarate, UPV/EHUko Euskararen eta Etengabeko Prestakuntzaren arloko errektoreordearen esanetan, unibertsitatea gune garrantzitsua da euskararen erabileraren ikuspegitik: "Kasu batzuetan, unibertsitatea aukeratzen da euskaraz egiteko gune gisa, eta hor sortzen diren harremanak finkatu egiten dira aurrerantzean. Beste batzuetan hiztun-berriek topo egiten dute hiztun-zaharrekin eta euskalkiekin, eta horrek eragina du bere gaitasunei buruzko auto-pertzepzioan. Modu batean eta bestean, unibertsitatea sarritan agertzen da, hizkuntzaren erabilerarekin zerikusia duen gune esanguratsu gisa. Euskal Herriko Unibertsitateko ikasleak eta langileak aktibatzeko helburuarekin 'Aktibatu' programa abiatu dugu".

Idoia Peñacobak, Mondragon Unibertsitateko Idazkari Nagusiak esan du, "Unibertsitatea gizartearen garapenean zerikusi handia duen eragilea da eta besteak-beste, garapen horretan, gazteen eskutik eragiten du unibertsitateak. Gazteak izango dira, etorkizun hurbilean gure herriko lidergoa hartu beharko duten pertsonak eta beraien esku egongo da berrikuntza eta garapena, baita ere, harremanetarako erabiliko duten hizkuntza. Hizkuntzari dagokionean, Ika Mizka Euskaraldiak aparteko aukera ematen digu arlo honetan gazteek duten iritzia ezagutzeko eta euskararekiko atxikimendua handitzeko."

Deustuko Unibertsitateko errektoreorde Josean Rodriguez Ranzek azpimarratu duenez, "gazte ikasleen egunerokoan Unibertsitateak zeresan handia du, formakuntza eta ikasketak ezezik, Unibertsitatea bizitzarako, harremanetarako eta esperientzietarako joko-zelai aproposa baita. Horietan guztietan: #euskaraldia".

Temas

Euskera

Contenido Patrocinado

Fotos

Vídeos