Beitu!, nerabeen aisialdia euskalduntzeko baliabide berria

Ane Atxutegi youtuberra da kolaboratzaileetako bat./YOUTUBE
Ane Atxutegi youtuberra da kolaboratzaileetako bat. / YOUTUBE

Plataforma digital honetan izena ematen duten gazteek WhatsApp bidez jasoko dituzte mugikorrean beraiek kontsumitzen dituzten aisialdi gaiekin lotutako edukiak

Azken hamarkadetan izugarri hasi da gazteen euskara maila, maila erabileraren bilakaera ez da izan hazkunde horren parekoa. Bien bitartean, sare sozialak bilakatu dira haien informazio eta aisialdi iturri nagusia, eta mugikorra aisialdiari lotutako edukiak kontsumitzeko gailu nagusia. Horrez gain, hizkuntza erabileraren inguruko ikerketek erakusten dute gazteek denbora librean kontsultatzen dituzten edukien artean euskarak ez duela ia presentziarik, gaztelania eta ingelesezko edukien bilaketak gora doazen bitartean.

Aldagai horiek guztiak kontuan harturik, Beitu! sortu du du Gaztezulok, 14-18 urte bitarteko gazteentzako diseinatutako plataforma digital berria. Ez da aplikazio bat, ez da hedabide arrunta, ez da sare sozial bat. Horietatik guztietatik zerbait hartuta, "teknologia berrietara egokitzen den plataforma digitala" sortu dute, alegia. Hilero, izena eman duten gazteek WhatsApp bidez mugikorrean jasoko dituzte beraiek kontsumitzen dituzten aisialdi gaiekin lotutako edukiak: elkarrizketa labur eta dibertigarriak, bideoak, umorea, sexu eta drogen inguruko kontsultak –modu pribatuan egiteko aukera eta adituek eskainitako zerbitzua–, lehiaketak… Eta, sustatzaileek diotenez, “beti modu entretenigarrian eta hizkuntza argia eta zuzena erabiliz”. Helburua da, berriz, “gazteek aisialdian kontsumitzen dutena euskaraz eta eskura jasotzea”.

Kolaboratzaile sare bat osatzeko helburua ere badu Beitu!k, gazteek gazteentzat sortutako plataforma izan dadin. Besteak beste, Ane Atxutegi eta Telmo Trenado youtuberrak, Mr. Euskaldun ilustratzailea, Xabi Martin iparra.eus proiektutik… "Gurekin kolaboratzen ari diren gazte hauek primeran asmatu dute publiko gaztearekin konektatzen", azaldu dute. Bestalde, "sare sozialen bidez, erabiltzaileek BEITU! osatzeko aukera izango dute, gustuko dituzten edukiak proposatuz".

Mugikorretarako sortua

Beitu! mugikorrean kontsumitzeko diseinatuta dago, eta eduki gehienek ikus-entzunezko formatua dute: bideo laburrak, sexu kontsultak, bideo-tutorialak, GIFak, memeak, argazkiak… Elkarrizketak eta erreportaje laburrak ere eskaintzen ditu, eta kolaboratzaile gazteen ilustrazio, bideo eta bestelako ekarpenekin osatzen da hilero, gazteen sormen plataforma bilakatuz.

Instagrami esker –@beitu_insta–, berriz, egunero jarraitzaileekin harreman zuzena mantenduko dute, "euren interesak, iritziak eta zalantzak entzunez, eta norabide bikoitzeko etengabeko komunikazioa mantenduz". Landutako beste sare sozial bat Spotify da; bertan sortutako zerrendaren bitartez, "euskal musika taldeen aldeko apustua" egingo dute.

Euskal Herri osoko 20 udal eta mankomunitateren babesa du Beitu!k momentu honetan. "Udalerri eta mankomunitate horien errealitatea oso anitza da: Donostia eta Iruñea hiriburuetatik hasi eta Bortzirietako mankomunitateraino" zehaztu dute.

Izan ere, Donostia izan da proiektu pilotua martxan jartzeko apustua egin duen lehenengo udalerria eta iaztik Donostiako Euskara Zerbitzuarekin elkarlanean aritu dira sustatzaileak, "egungo gazteen kontsumo ohitura berrietara egokitzeko asmoz".

Egun, 50 ikastetxe baino gehiagorekin dabiltza elkarlanean, eta azken hilabetean 500 izen-emate berri izan dituzte. Sare sozialetan ere geroz eta gehiago zabaltzen ari da @beitu_insta profilaren bidez eta dagoeneko 1.000 jarraitzailera iritsi dira.

Beitu! hilero jaso ahal izateko, izena eman behar da. Doakoa da, eta bi modutara egin daiteke: Instagram kontuko portadan azaltzen den estekan klik eginez edo zuzenean orrialdean sartuz. Behin harpidetza eginda, erabiltzailea komunitatearen kide izango da eta hilero WhatsAppean jasoko du.

"Gazteek gazteentzat egindako komunikabidea denez", talentu bereziren bat duten gazteen bila dabil, eta horretarako lehiaketa jarri du martxan. "Ilustratzailea, magoa, gamerra, youtuberra, marrazkilaria, abeslaria, makillatzailea, umorista... direna direla, beren abileziak munduari erakutsi nahi dieten gazteek lekua dute", diote. Parte hartzeko, beren afizioa kontatu besterik ez dute egin behar, beitu@gaztezulo.eus emailaren bitartez.

Temas

Euskera

Fotos

Vídeos