Azoka tradizionalak ezagutzeko aukera dute aurten ere eskola-umeek

Artxiboko argazkian, iaz Donostiako Bretxan egin zen saioari dagokion irudia. / USOZ

150 neska-mutikok hartuko dute parte Jaurlaritzak antolatutako Sukaldaritza Sortzen Kidz ekimenean EAEko hiru hiriburuetan

Eusko Jaurlaritzako Turismo, Merkataritza eta Kontsumo Sailak Sukaldaritza Sortzen Kidz egitasmoa jarriko du abian. Azoka tradizionalen kultura eta produktuak 150 eskola haurren artean ezagutzera ematea da helburua. Hala, azoketan zuzenean parte hartuko dute eta eragile bihurtuko dira beren ingurunean.

Egitasmoaren helburuak dira azoka leku dinamiko bilakatzea, bere balioa nabarmentzea belaunaldi berrien artean eta kultura eta produktu gastronomikoak indartzea, gazteenen artean azoka tradizionalen marka berreskuratuz. Ikasleak "emozionalki" erakartzea da asmoa, tokiko merkataritza eta azoka tradizionala babestuz, Eusko Jaurlaritzak jakinarazi duenez.

Euskal Autonomia Erkidegoko (EAE) lurralde bakoitzeko bina hezkuntza zentrok parte hartuko dute programan. Ikastetxe bakoitzeko taldea azokara hurbilduko da eta bertan chef batek azoka erakutsiko die eta sasoiko produktuez, tradizioez, elikadura osasungarriaz eta kultura gastronomikoaz hitz egingo die; ondoren showcooking saio bat egingo du azokan bertan.

Juan Andrade Jaurlaritzako Merkataritzako zuzendariak lankidetza honen garrantzia nabarmendu du. "Azoka tradizionaletara eramango ditu haurrak haien interesa pizteko propio garatutako programa baten eskutik", esan du. Gainera, saio bakoitzean bideoak egingo dira, eta ikastetxeetara bidaliko dira jarduera desberdinak egiteko.

Azoketara bertaratu diren ikasle guztiek bideo bat bidali ahal izango dute, azokan ikasi zuten errezeta bat lantzen erakutsiko duena, eta epaimahai profesional batek hautatuko du Euskadiko leku bakoitzeko onena. Zorioneko haurrek aukera paregabea izango dute Mario Palacios MasterChef Junior I telebista saioko saridunarekin sukaldaritzan aritzeko urriaren 31n Donostiako Bretxa azokan izango den final handian, non 150 haur inguru bertaratuko diren. Gorka Irisarri (Danontzat), Aitor Arregi (Elkano), Mikel Fiestras (La Regadera), Manu Jugo (Topa), Paul Arrillaga (Zazpi) eta Mario Palacios izango dira epaimahaikide.

Ekitaldiak 2017ko urrian zehar egingo dira, eta Bilboko Erribera merkatua, Donostiako Bretxa azoka eta Gasteizko Azoka plaza aukerratu dira.

Temas

Euskera

Fotos

Vídeos