Euskal kazetaritzak azken 30 urteotan izan dituen 10 mugarrien bila

Ezkerretik eskuinera, Iban Arantzabal, Estibaliz Alkorta, Ainara Rodríguez eta Patxi Baztarrika./IÑIGO SÁNCHEZ
Ezkerretik eskuinera, Iban Arantzabal, Estibaliz Alkorta, Ainara Rodríguez eta Patxi Baztarrika. / IÑIGO SÁNCHEZ

2019an gauzatuko den eraberritze sakonaren atarian, edizio berezi batekin ospatuko du 30. urteurrena, '30 urte, 10 mugarri' lelopean, Eusko Jaurlaritzak eta Andoaingo Udalak antolatzen duten Rikardo Arregi Kazetaritza Sariak

N. AZURMENDI

2017ko euskarazko kazetaritza lanik onenek ez dute berariazko aitorpenik izango aurten Andoaingo Udalak eta Eusko Jaurlaritzak antolatzen duten Ricardo Arregi Kazetaritza Sarian. Ez, behintzat, ez badira sartzen azken hamarkadetako euskarazko kazetaritzaren 10 mugarrien multzoan.

Euskarazko kazetaritza norabide berrian jarri zuen Rikardo Arregiren (1942-1969) omenez sortutako saria 30. ediziora iritsi dela ospatzeko, formatu arrunta alboratu eta planteamendu ezohikoa egin dute aurten. Estibaliz Alkorta Eusko Jaurlaritzako Euskara Sustatzeko zuzendariak eta Ainara Rodriguez Andoaingo Udaleko Euskara zinegotzi eta alkateordeak aurkeztu dute atzo Donostian edizio berezia.

Patxi Baztarrika Andoaingo Udaleko Euskara teknikariak, berriz, Sariaren webgune berriaren xehetasunak eskaini ditu. Edizio guztietako lanak eta gainerako informazioa (oinarriak, aktak, sarituen soslaiak, argazkiak...) jasoko ditu, modu argi eta eskuragarrian, eta maiatzean aktibatuko da, eduki guziak kargatuta dauzkanean. Une horretatik aurrera, euskarazko kazetaritzaren bilakaeraren isla bikaina izango da.

Iaz 'Kulturrizketak' saioagatik Rikardo Arregi saria jaso zuen Goienako zuzendari nagusi Iban Arantzabal ere izan da aurkezpenean. Sariak euskal kazetaritzari egin dion ekarpena nabarmendu eta eskertzeaz gain, etorkizunari begirako gogoeta ere egin du. Hedabideen alorrean «garrantzia izaten jarraitzen duena kazetaria eta kazetaritza bera» direla berretsi du, eta ezinbestekotzat jo du kalitatea bilatzea eta zaintzea. Euskarazko hedabideek aurrera egin eta publiko zabalago batengana iritsi nahi badute, ordea, «kalitateaz haragoko beste zerbait beharko dute, oso garrantzitsua izan arren kalitatea ez baita dena».

Ekainaren 15era arte

Euskarazko kazetaritza eta Rikardo Arregi Saria hurbileko bidelagun izan dira euskal hedabide eta kazetarien bilakaera azkarra ikusi duten 30 urteotan. Azkenekoetan bereziki bizkortu denez, sare sozialen eta teknologia berrien eraginagatik batik bat, 31. edizioan egoera berri horri egokituko zaio RAKS.

Fase berrian sartu aurretik, baina, euskarazko kazetaritza heldutasunera iristeko erabakigarriak izan diren hiru hamarkada horietako ale onenak bildu eta saritu nahi dira. Rikardo Arregi Kazetaritza Sariaren helburua euskarazko kazetaritzaren kalitatea, bikaintasuna eta berrikuntza bultzatzea izanik, edizio honen xedea izango da azken hamarkadotan «aitzindari, erreferentzia nagusi, bidegile edota bide erakusle» izan diren lanak nabarmenduko dira.

Ainara Rodriguez zinegotzi eta epaimahai buruak adierazi duenez, urteurrena ez ezik «euskarazko kazetaritzak egin duten bide oparoa» ospatu nahi da, eta Arregiren legatua eguneratu. «Rikardo Arregik egin zuen kazetaritza bere garaian mugarri izan zen, guztiz berritzailea baitzen, eta ordutik gure egunotara arteko aurrerakuntza ez da berez gertatu, jende askoren lana dago hor», azaldu du.

10 mugarri horiek izan daitezke «pertsonak, hedabideak, ibilbideak, sustapen lanak, erremintak edota kazetaritza-lan erreferentzialak», eta herritarren esku dago proposamenak egitea, erabakia epaimahai batek hartuko badu ere. Norbanakoek zein izaera juridikoa duten erakundeek aurkez ditzakete proposamenak, behar bezala arrazoituak, ekainaren 15era arte. XXX. Rikardo Arregi Kazetaritza Sarirako dela azalduz, Andoaingo Udaleko Euskara Zerbitzura (Goikoplaza, z/g. 20140 Andoain) postaz, edo posta elektronikoz euskarazerbitzua@andoain.eus helbidera.

10 sarituak urrian emango dira aditzera, Sariaren 30. urtebetetzea ospatzeko jai batean. «Rikardo Arregi kazetari zenaz geroztik euskarazko kazetaritzak eta komunikazioak egin duten bidea ospatzeko aitzakia izango da, eta bide horretan protagonista izan direnak bilduko dira han», aurreratu dute. Saridunek berariaz prestatutako arte-lan bana eta diploma jasoko dute.

Temas

Euskera

Contenido Patrocinado

Fotos

Vídeos