Arantzazuko Basilikaren eraikuntza umeei hobeto ulertzen laguntzeko tailerrak

Arantzazuko eliza barrutik/
Arantzazuko eliza barrutik

Apirilaren 14rako eta 28rako lantegia egingo dute 6 eta 11 urte bitarteko haurrei zuzenduta, Arantzazun bertan

DVDonostia

Arantzazu Gaur Fundazioak eta Jorge Oteiza Fundazio-Museoak haurrei eskainitako arkitektura lantegi bateko bi saio antolatu dituzte apirilaren 14rako eta 28rako, 10:30etik 13:30era. Francisco J. Sáenz de Oiza eta Luis Laorga arkitektoek eta Jorge Oteiza, Eduardo Chillida, Nestor Basterretxea, Lucio Muñoz, Xavier Alvarez de Eulate eta Xabier Egaña artistek Arantzazuko Basilika gauzatzeko elkarrekin egin zuten lana ezagutzera ematea helburua.

Antolakuntzak jakinarazi duenez, Donostiako Maushaus arkitektura estudioak emango du lantegia, Arantzazun bertan, 6 eta 11 urte bitarteko haurrei zuzenduta. Aurrez, 2011. urtean, antzeko beste tailer bat eskaini zuen Altzuzako Jorge Oteiza Fundazio-Museoan, eta 2013an beste bat, Arantzazuko Santutegian bertan.

Lantegia goizeko 10:30etan hasiko da, Basilikan egingo den bisita gidatuarekin. Haurrek eraikina osatzen duten eraikuntza eta arte elementuak identifikatu beharko dituzte. Izan ere, tailerraren xede nagusia arkitekturak gainerako arteekin duen berezko lotura bistan jartzea da, eskulturek eta pinturek ere basilika osatzeko eraikuntzako elementu gisa duten balioa nabarmenduz.

Behin basilikako elementu desberdinak identifikatu dituztenean, parte hartzaileek Gandiaga Topagunera joko dute, eta han jarraituko dute lanean. Hiru taldetan banatuko dira -arkitektoak, eskultoreak eta pintoreak-, eta diziplina bakoitzak eraikuntza bat osatzeko orduan izaten dituen erronkei aurre egin beharko diete. Prozesu honetan obrak osatzeko beharrezkoak diren lanez eta prozesuez jabetuko dira, baita tenplua altxatu ahal izateko gainerako diziplinekin ezinbestekoa den koordinazioaz ere.

Lantegiaren emaitza Arantzazuko Basilikaren maketa-interpretazioa izango da. Haurrek era askotako materialez egin beharko dute maketa, besteak beste, kartoiz, plastiko likidoz, pasta zuriz, tenpera pinturaz eta abarrez.

Izena emateko info@arantzazugandiaga.com helbidera idatzi behar da, edota 943 716 575 nahiz 662 181 353 telefono zenbakietara deitu. Parte hartzaile bakoitzak hiru euro ordaindu beharko ditu.

Temas

Euskera

Contenido Patrocinado

Fotos

Vídeos