2019ko Euskaraldiak era guztietako entitateekin egingo du aktibazio-ariketa

Pello Ramirezen eta Uxue Alberdiren emanaldiarekin amaitu da Udaltop./
Pello Ramirezen eta Uxue Alberdiren emanaldiarekin amaitu da Udaltop.

Datorren urtera arte agurtu dira inoizko parte-hartzaile kopuru handiena izan duten Udaltop Udaletako Euskara Zerbitzuen Topaketak

Ostiral eguerdian amaitu da Udaltop Udaletako Euskara Zerbitzuen Topaketen hamargarren edizioa. Inoizko parte-hartzaile kopuru handiena izan duen edizioa ere izan da aurtengoa, 270 pertsonak eman baitute izena. «Bederatzi hitzaldi, proposamen berri baten aurkezpena, proposamenari ekarpenak egiteko saioa, ekarpen lanak, amaiera ekitaldia eta sorpresak» izan dira, antolatzaileen hitzetan, hamargarren edizio honetako zutarri nagusiak.

Bi egunez, Lasarte-Oriako Manuel Lekuona Kultur Etxean elkartu diren Arabako, Gipuzkoako, Bizkaiako, Nafarroako, Lapurdiko eta Nafarroa Beherako euskara teknikariak, arduradun politikoak, irakasleak, hizlariak eta beste hainbat esparruetako langileak hizkuntza-ohiturak aldatzeko bideen, esperientzien eta ikerketen berri jaso dute. Agurra ere berezia izan da, txelo baten soinuaz emanaldiarekin agurtuta, Pello Ramirez biolontxelo-jolearen eta Uxue Alberdi bertsolariaren melodien eta hitzekin.

Azken saioan, arreta berezia bereganatu du Eusko Jaurlaritzako Hizkuntza Politikarako Sailburuordetza eta Euskaltzaleen Topagunea elkarrekin lantzen ari diren 'Euskaraldia 2019: arau sozialak iraultzeko babes guneak' proposamen berriak.

Euskaraldiak 2018ko azaroaren 23tik abenduaren 3ra proposatutako ariketaz gain, 2019 urterako diseinatzen hasia dagoen Euskaraldiaren bigarren edizioaren lehen oinarriak jarri dira Udaltop topaketaren bigarren egun honetan. Eusko Jaurlaritzako Hizkuntza Politikarako Sailburuordetzako ordezkari Estibaliz Alkortak eta Euskaltzaleen Topaguneko zuzendari Jasone Mendizabalek aurkeztu dute lehen proposamen hori 'Euskaraldia 2019: arau sozialak iraultzeko babes guneak' titulua izan duen hitzaldian.

Aurten hiztunekin egindako ariketari datorren urtean era guztietako entitateen babes neurriak gehituko zaizkiela azaldu dute eta hizkuntza ohituren aldaketan erakunde, enpresa eta bestelako ntitateek duten garrantzia azpimarratu. Udaltopen parte hartzen ari diren guztien ekarpenak jasota, udararteko epea jarri dute 2019ko Euskaraldia irudikatzen jarraitzeko.

Aurretik, Pello Jauregiren 'Hizkuntza-ohiturak plano pertsonaletik kolektibora' hitzaldiak zabaldu du goiza. Proposamenaren aurkezpenak ekarpen lanerako aukera izan du eta Udaltopeko parte hartzaileek beren ekarpenak egiteko aukera izan dute horretara bideratu den saioan. Lantegiek bide eman die Ane Barrusoren eta Estepan Plazaolaren 'Maleta bete belarritako' eta Ainhoa Mendibilen eta Jon Ander Loidiren 'Eta PRESTatzen badugu lan mundua?' hitzaldiei. Hitzaldi horietako asko web gunearen 'dokumentuak' atalean daude eskuragarri.

Temas

Euskera

Contenido Patrocinado

Fotos

Vídeos