Diario Vasco

Ekinbide juridiko berriak jarriko ditu martxan Gurasosek

Joan den larunbateko manifestazioaren burua.
Joan den larunbateko manifestazioaren burua. / PEDRO MARTÍNEZ
  • Horrekin batera, azaroaren 17an aurkeztutako bide orria eragile sozial eta politikoen eta herritarren artean zabaltzeko asmoa dutela adierazi dute plataformaren ordezkariek

Gurasosek bere bide orria ezagutzera emateko asmoz eragile sozial eta politikoekin bilera erronda hasiko duela jakinarazi du ostegun honetan egindako agerraldian. Era berean, «beraien seme-alabekiko erantzukizunagatik» bide juridikoari ere eutsi egingo diola adierazi du, eta datorren astean ekinbide berriak jarriko ditu abian. Azkenik, Baietz 200.000! informazio eskubidearen aldeko sare-errebolta jarri du martxan.

Joan den larunbatean Donostian egin zen manifestazioa ere baloratu dute, adieraziz oso pozik daudela herritarren erantzunagatik. GuraSOSen kalkuluen arabera, 8.000-10.000 pertsonek hartu zuten parte manifestazioan -«ekaineko manifestazioan baino bikoitza eta gehiago», esan dute, eta plataformaren ordezkarien ustez horrek erakutsi du «adostasunaren alde egiten ari diren lanak fruitua ematen hasi dela. Gizarteak bat egin du gurekin informazio gehiago, eztabaida gehiago eta Gipuzkoa hobeago baten aldeko hautuarekin. Manifestazioaren helburuak GURASOSek proposatutako bide orriari babesa eman, lizitazioak gelditzeko eskatu eta adostasuna lortzeko oraindik garaiz gaudela aldarrikatzea izan dira, eta jendeak nahi horrekin bat egiten duela frogatu da. Gipuzkoarrek liskarra gainditu eta adostasunaren aldeko apustua egiten dutela adierazi dute»

Informazio eskubidearen aldeko sare-errebolta martxan jarriko duela ere adierazi dute: «Pasa den larunbatean, gure telebista publikoak manifestazioari buruz informazioa jasotzeko dugun eskubidea urratu zuela uste dugu, honen berririk eman ez zuenean. Horregatik egoera horri buelta eman nahi diogu beste gizarte mobilizazio bat martxan jarriz». Bideo bat egin dute, alegia, eta erronka da 200.000 lagunek irudi horiek ikustea. Bideoa YouTuben jarri dute eta herritarrei ere eskatu diete parteka dezaten.

Bestalde, azaroaren 17an aurkeztu zuen hondakinen gaiari irtenbidea emateko zortzi puntuko bide orria eragile sozial eta politikoen eta herritarren artean zabaltzeko asmoa dutela adierazi dute plataformaren ordezkariek. Urte bukaera arte bide orria ezagutzera eman eta atxikimendua jasotzeko bilera erronda egingo dute eragile politiko eta sozialekin. Errondaren amaieran beste agerraldi bat egingo dutela esan dute, bertako emaitzak ezagutzera emateko.

Azkenik, dagoeneko martxan dituenaz gain, ekinbide juridiko berriak martxan jarriko dituela eman du ezagutzera: «Zalantzarik gabe, adostasunaren bidean sinesten dugu, eta hori da lehenesten dugun lan-ildoa, baina gure seme-alabekiko dugun erantzukizunagatik bide juridikoari ere eutsi beharrean gaude».

Abuztuaren 29an Ingurumen baimenaren aurka Eusko Jaurlaritzako Ingurumen Sailburuaren aurrean gora jotzeko 40 orriko errekurtso administratiboa jarri zuen Gurasosek. Hiru hilabete pasata ez dutenez erantzunik jaso, «ireki da bidea auzitegietara gai hau eramateko». Euskadiko Auzitegi Nagusiko administrazioarekiko Salaren aurrean errekurtsoa jarriko du Gurasosek hurrengo astean eta bide batez, lizitazioaren baimenaren suspentsioa eskatuko dute. Gauza bera egingo dute Donostiako epaitegian.

Temas

Recibe nuestras newsletters en tu email

Apúntate