Diario Vasco

Errezil sagarra protagonista Gabirian

fotogalería

Azoka. Baserriko produktuen azoka, igande goizerako plan bikaina. / ARGAZKIAK: MARIN

  • Aurten ere lehiaketa eta baserriko produktuen azoka oso arrakastatsuak izan dira

  • Anttoni Murgiondo, Miren Agirrezabala eta Iñaki Maiz izan ziren sarituak

Atzo goiz-eguerdian Gabiriako plazara gerturatze hutsarekin sagar perfumea nabaritzen zen, urtero lez bertan nagusi den errezil sagar barietatearen lehiaketa eta baserriko produktuen azokari esker. Beste urteetan egiten den moduan, Josu Osa zuhaitzak nola kimatu eta txertatu azaltzen ibili zen, eta Lontxo Ormazabal sukaldariak konpota nola egiten den irakatsi zuen. Baina egunari emozio pixka bat gehiago eransten dion faktorea lehiaketarena da. Goierri-Beheko ezti lehiaketaren irabazleak Igor Altuna, Bittor Murgiondo eta Ageda Zeberio izan ziren. Sagar-goxo lehiaketan, Izar Erdi baserriko Pakita Galdosena gailendu zen.

Errezil sagar lehiaketari dagokionez berriz, Izar Handiko Maria Isabel Zumalakarregi, Urkiola baserriko Iñaki Arratibel eta Kataraingo Pedro Iztueta nagusitu ziren. Baina hiru hauek aurten ezin izan dute saririk jaso, iaz ere beraiek irabazi zutelako. Hori dela eta sariak klasifikazioko hurrengo hirurek jaso zituzten: Behekoetxe baserriko Anttoni Murgiondo, Oñatibi txikiko Miren Agirrezabala, eta Euzkitza baserriko Iñaki Maiz izan ziren. Sari banatzaile lanetan Iñaki Etxezarreta alkatea, antzolatzaile den Erbie elkarteko kide den Eli Murua eta Ainhoa Aizpuru diputatua aritu ziren.

Momenturik hunkigarriena Ramon Aseginolaza eta Xabier Mujikarekin batera epaimahaian egon eta ekitaldia posible egiten lagundu duen Antton Olaizolari eginiko omenaldia izan zen.

Recibe nuestras newsletters en tu email

Apúntate