Diario Vasco

Mondejurik onenak, Urkolarenak

fotogalería

Amaia Urkolak jaso zuen txapela, Zaldibian ospatu zen Ardiki Egunean. / JOSÉ MARI LÓPEZ

  • Aralarko gaztarekin, berriz, errezilgo Juan Mari Zinkunegi (Aitzarte elkartea) izan zen irabazle

  • Ahizpa zaharrenari, iazko irabazleari, ahizpa gazteak hartu dio erreleboa

. Ardiki Kutur Elkarteak antolaturik, atzo egin zen, Zaldibian, XXII. Ardiki Eguna. Jende ugari bildu zen. Giro ederrean bete zen programan iragarririk zegoena: azoka, lehiaketa, erakusketa, dantza, musika, eta abar. Ikusgaien artean hau nabarmen: asta-zerra, gure adineko eta gazteagoentzat nahiko ez-ezaguna.

Programaz kanpo ere izan zen mugimendurik: batetik euskal artisau asko etorri zen beren lan finak azaldu eta saltzera. Bestelako saltzaile ibiltariak ere ez dira gutxi izaten.

Mondeju lehiaketari dagokionez, esan dezakegu txapela ez dela etxez aldatu: Isabel Urkolaren, iazko irabazlearen, burutik Amaia Urkolaren burura pasatu da txapela. Ahizpa zaharrenari ahizpa gazteak hartu dio erreleboa.

Zaldibiako Illati taberna eta Zuloeta baserriaren artean dabil jokoa. Ez da Zuloeta baserriko Amaia Urkolak txapela eskuratzen duten lehen aldia; 2013an ere bera izan zen txapeldun. Eneko Urkolak (Zaldibia) eta Amets Galartzak (Amezketa) lortu zuten bigarren postua. «Kasatik kondea», dio esaera zahar eta bete-betean konplitzen da, irabazlearen iloba eta semea baitira biok. Senosek (Gantzarain anaiak, Oto anaiak, Pungi Aranguren, Peizio eta Asier Muruak osatzen duten taldeak) eskuratu zuen hirugarren postua, iaz bezalaxe. Hogeita lau kazuela aurkeztu ziren guztira.

Aralarko Gazta Lehiaketan, berriz, Errezilgo Juan Mari Zinkunegi (Aitzarte elkartea) izan zen irabazle. Hiru urteotan segidan atera du saria, iaz eta orain bi urte, bigarrena, eta aurten, lehenengoa. Doniturrieta Garakoan larreratzen ditu ardiak Juan Marik. Ataungo Isidro Sukia, iazko txapelduna, irten zen txapeldunorde. Isidrok Doniturrieta Azpikoan gobernatzen du artalde ugari bezain ona. Aitor Iztueta lazkaotarrak eskuratu zuen hirugarren saria. Eluxeta Goikoan dago ardiekin. Hamabost gazta aurkeztu ziren. Azpimarratzekoa da, txapelduna ateratzeko, desenpatea egin behar izan zela.

Egañak eta Lizasok, urtero egiten duten eran, bertsotan aurkeztu zuten epaimahaiak emandako erabakia. Sei bertso izaten dira: batak mondeju-lehiaketako hiru lehenengoei, eta besteak, gazta-txapelketako irabazleei. Hauek aritu ziren epaimahaiko-lanetan, mondejuari dagokionez: Iban Mate, Beasaingo Dolare jatetxeko sukaldaria eta Tolosako 'Julian' jatetxeko Matias Gorrotxategi. Gazta lehiaketan: Ttale Ouret, Iparraldekoa eta Iratiko artzaina, Idiazabalgo Gaztintxulo artzaina eta Zaldibiako Lazkaoetxe jatetxeko Eneko Azurmendi.

Recibe nuestras newsletters en tu email

Apúntate