Diario Vasco

Euskararen 9. Maratoi arrakastatsua

vídeo

Harrijasotzaileak elkarri bostekoa ematen. / TXEMA

  • '40 egun baietz' lelopean jarraituko du euskararen aldeko erronkak herrian

Giro ezin hobean jarraitu zuen atzo Euskararen 9. Maratoiak. Nabariak ziren goizealdean aurreko gauak utzitako ajeak. Sorgin afariaren ostean kontaezinak diren ikuskizunak eskaini omen ziren Akelarre handiaren barnean. Ez zen falta izan azken maratoietan ohikoa bilakatu den Jon Iñaki Elexpururen monologo umoretsua, sekulako barre-algarak eragin zituena.

Gosariaren ondoren, dianak esnatu zituen oraindik lotan zeuden herritarrak. Egia esan, eguraldiak eguneko lehen orduetan lagundu ez bazuen ere, ez zuen horrek inola ere oztopatu aurreikusita zeuden ekintzetan jende ugari bildu izana. Bederatzietan suak martxan jarri zituzten, eguerdirako babarrunak eta gaueko txekorra prestatzen hasteko. Babarrun lehiaketa egin zen, eta eguerdi aldera jakinarazi zen Lasartearra elkartea gertatu zela garaile.

Aurretik arrakasta berezia izan zuen herri kirol desafioak. Bertan Urtzi Telleria izan zen izar nagusia. Oholtzatik pasatu izan ziren baita Ttirriki-Ttarrakakoak eta Xumela eta Alboka abesbatzakoak.

Bazkalondoren, festak bizi-bizi jarraitu zuen antzerkia eta Oaintxe in deu txarangarekin. Buruhandiek ere ez zuten hutsik egin. Lau urte hauetan jaiotako haurrei ongi etorri egin ondoren, Txulalai erraldoia dantza saioa izan zen. Mikroek sutan jarraitu zuten arratsalde osoan. Oholtzaratutakoen artean '40 egun baietz' erronkan lehen astean ahobizi izatearen ardura izango dutenak egon ziren. Txekor jana arrakastatsua gertatu zen, eta unerik gorenetako bat, 'Eusko-Oskarren' banaketa izan zen. Urte honetan ospakizunetan dabiltzan zenbait erakunderi (Landaberri, Ttakun, Bertso eskola...) egindako lanaren aitortza egin zitzaien jendaurrean. Hamabiak heltzear zeudela, eta Alboka, Erketz eta Zero Setteren emanaldien ondoren, emozioz beteriko amaiera eman zitzaion Lasarte-Oriako Euskararen 9. Maratoiari. Baina, esan dugun moduan, ez dira Maratoiarekin amaitu Lasarte-Oriak euskara dela-eta, bere buruari ezarri nahi dizkion erronkak. Datozen berrogei egunetan bi mila lagun inguru arituko baitira bai 'ahobizi' zein 'belarriprest' gisa, '40 egun baietz' lelopean botatako desafio berriari aurre egin nahian.

Recibe nuestras newsletters en tu email

Apúntate