Diario Vasco

Garestitu egin ziren irailean bigarren eskuko autoak

Ficoauto azokaren iazko edizioa.
Ficoauto azokaren iazko edizioa. / F. DE LA HERA
  • Batez besteko prezioa %7,8 igo zen Euskadin, eta 15.109 eurotan geratu zen. Garestitzea handiagoa izan zen Gipuzkoan, %17koa

Bigarren eskuko autoak %7,8 garestitu ziren irailean Euskadin, coches.net atariak emandako datuen arabera. Hala, erabilitako auto baten batez besteko prezioa 15.109 eurotan geratu zen EAEn.

Edonola ere, garestitzea Estatuko beste erkidego batzuetan baino motelagoa izan da. Estatu mailan prezioek %10,9 egin badute gora, erkidegoren batzuetan askoz handiagoa izan da igoera: %23,8 Kanariar Uharteetan, %21,5ekoa Murtzian, %19koa Kantabrian...

EAEko lurraldeen arteko aldeei dagokienez, autorik merkeenak Araban aurki daitezke (14.334 euro, batez beste), eta garestienak Bizkaian (15.280 euro). Gipuzkoa bien artean dago prezioari dagokionez, baina inon baino gehiago garestitu ziren autoak joan den hilean: %17, Bizkaian baino hamar puntu gehiago.

Eskaintzan diesel motorrak dituzten autoek jarraitzen dute nagusi izaten, guztizkoaren %75arekin. Salgai dauden erabilitako ibilgailuek dituzten urteei dagokienez, berriz, orekatuta daude bost urtetik beherakoak (%55) eta seitik gorakoak (%45).

Salmenten buruan ere diesel modeloak egon ziren (%68), eta hamar urtetik gorakoak (%53). Renault Mégane, Volkswagen Golf eta Ford Focus modeloak izan omen dira gehien saldu direnak.

Temas

Recibe nuestras newsletters en tu email

Apúntate