Diario Vasco

70.000 langile dituzte Euskadin kultura eta sorkuntza industriek

Bideo-jokoen sektoreak gero eta garrantzi handiagoa du.
Bideo-jokoen sektoreak gero eta garrantzi handiagoa du. / AP
  • Innobasquek antolatutako jardunaldi batek agerian utzi du sektorek horrek ekonomiaren eta enpleguaren aldetik duen garrantzia

Kultura eta sorkuntza-industrien sektoreak ekonomiaren eta enpleguaren aldetik ere badu garrantzia. Sektore horretan, hain zuzen, 14.459 enpresa daude Euskadin (guztien %9), 70.000 pertsonari enplegua ematen dietenak (enpleguaren %8). Euskal BPGri egiten dioten ekarpena, azterketen arabera, %3 eta %5 artekoa da; Europan, berriz, sektore hau BPGren %6,9 da eta enpleguaren %6,5 sortzen du. Sorkuntza-industrien arloan sartzen diren 15 azpi-arloak honako hauek dira: arkitektura, diseinua, moda, ikus-entzunezkoak eta eduki digitalak, zinema, bideojokoak, musika, arte eszenikoak, ikus arteak, publizitatea eta marketina, kultura-ondarea, eskulangintza, argitalpena eta hizkuntzaren industriak; lurralde-aukera gisa identifikatu dute.

Elikadura, ekosistemak eta hiri-habitatarekin batera, RIS3 espezializazio adimendunaren euskal estrategiaren lau aukera-lurraldeetako bat dira, Euskadi 2020 Zientzia, Teknologia eta Berrikuntzako Planean jasoa, balio erantsi handiko arloetan sakontzen duena, hazkundea eta enplegua eragiteko produktu eta zerbitzu berriak sor ditzaten. Horrela adierazi zuen Innobasqueko presidenteak, Alberto García Erauzkinek, ostegunean egin zen 'Innobasqueko Astearteak: espezializazio adimenduna kultura- eta sorkuntza-industrietan'; Cristina Uriartek, Eusko Jaurlaritzako Hezkuntza, Hizkuntza Politika eta Kultura sailburuak, eman zion saioari bukaera, bere Saila baita kultura- eta sorkuntza-industrietan espezializazio adimendunaren estrategiaren eta honen hedapenerako pilotatze-taldearen liderra. Uriartek esan zuen «gaur bistaratzen dugula, geuretzat eta gizartearentzat, sektore honen existentzia eta bere sorkuntza- eta enpresa-ahalmena. Era berean bistaratzen dugu euskal erakundeen apustua sormena eta kultura Euskadiko ekonomia- eta gizarte-garapenaren ildo nagusien artean sartzeko». «Jaurlaritzak ulertu du kultura eta sorkuntza industriek etorkizunerako duten garrantzia eta ahalmena, irmo sinetsi du sektoreak duen aukeran Herri honen ekonomia-garapenerako, enplegurako, berrikuntzarako eta gizarte-sormenean eta gizarte-kohesioan aurrera egiteko», gaineratu zuen. Uriarte eta García Erauzkin-ez gain, sektoreko ordezkari ugarik hartu zuten parte ekitaldian.

Zenbait esperientzia

Eusko Jaurlaritzako Kultura sailburuordea den Joxean Muñozek esan zuen, bestalde, ETEak nagusi izan arren arlo honetan, badirela 850 enpresa milioi bat euro baino gehiago sartzen dituztenak urtean arlo honetan, eta gutxienez 90 trakzio-enpresa daudela, hau da, biziki nazioartekoturik daudelarik, 4 eta 40 milioi euro artean fakturatzen dituztenak. Muñozek gogorarazi du badela berrikuntza-funts bat arlo honetako edozein enpresarentzat, proiektu berritzaileak edo I+G-koak, teknologia-transferentzia edo negozio-eredu berriak baldin baditu.

Ondoren, merkatu globaletan diharduten eduki-enpresen ahalmena nabarmendu zuen Eiken-eko Aletxu Etxebarriak, eta formatu berriekin erlazionaturiko garapenetan sakondu du. Bestalde, Habic-eko Eduardo Jimenezek gogorarazi zuen klusterrak hiru pilotatze-taldetan parte hartzen duela, hor sartuta kulturakoa, eta bera buru duten erakundekoak diren enpresek (sektoreko %73) 5.300 pertsona enplegatzen dituztela eta 65 milioi euro inbertitzen dituztela I+G-n.

Jarraian, Basquegame-ko Unai Extremok bideo-jokoen zeharkakotasuna azpimarratu zuen, industria 4.0, prestakuntza, osasuna, aisialdia… bezalako arloetan ere erabiltzen baitira. Honela, elkarte honetako 30 enpresek 14,5 milioi euro fakturatzen dituzte, mundu osoan 1.775 milioi gamer eta 81,5 bilioi dolar mugitzen dituen merkatuan, %8ko erritmoan haziz.

Eta honela sektoreko 6 enpresa-errealitate azaldu ziren gero, nazioarteko merkatuetan dabiltzanak eta berrikuntza eta sormenaren trakziogile direnak: Skunfunk, Cookplay, Estudios Durero, Mondragon Lingua, Dhemen Studio eta Gasteizko Santa Maria Katedrala Fundazioa.

Skunfunk moda-enpresak indartsu egin du iraunkortasunaren eta bere materialak birziklatzearen alde, aldi berean teknologia berrien erronkari aurre eginez. Bestalde, Estudios Durero-koak industria grafiko honek, berrikuntzan eta kanpora irekitzean oinarrituta, bizi izandako birmoldaketa-prozesua azaldu du. Mondragon Linguak bere dimentsiorik nazioartekoena erakutsi du, eta nola aurre egiten zaien hizkuntzaren prozesaketa adimendunak eskaintzen dituen zerbitzu eta aukera berriei. Cookplayk erakutsi du enpresa-egitura txiki bat nola mugitzen den arrakastaz nazioarteko merkatuetan. Diseinu profesionalak ematen duen zeharkakotasunaren balioa Dhemen Studiok aurkezturiko indar-gunea izan da. Gasteizko Santa Maria Katedrala Fundazioak ondare arkitektonikoko beste sektore batzuekin egindako hainbat elkarlan zerrendatu ditu, eta Europako Batzordearen Horizon(te) 2020k finantzaturiko europar proiektu batean izan duen parte-hartzea azaldu du, hor hainbat nazionalitatetako erakundeen arteko elkarlana balioesten delarik.

Temas

Recibe nuestras newsletters en tu email

Apúntate