Aurreiritziak gainditzeko, eguneroko kontuak

Aurtengo sentsibilizazio kanpainako protagonistak astelehen honetan Donostian egin den aurkezpenean izan dira. «Ohiko egun batean lanetik atera, etxean jan eta telebista apur bat ikusi ostean Donostiara joaten naiz zinema eta bideo klaseetara», azaldu du Sergiok, 21 urteko irundarrak. Bestalde, Lucíak pianoa jotzen du eta ostegunetan 'pintxopotera' joan zalea dela azaldu du, «ez dut bat bera galtzen».

Guztira 8.000 kartel jarriko dira Gipuzkoako hainbat herritako autobus geltokietan. Horretaz gain, «birala bihurtu nahi dugun bideo bat» ekoitzi du Atzegik, Mitxel Lakunza kanpainaren antolatzaileak adierazi duenez.

Horrekin batera, hainbat galdetegi sortu dira, atzegi.org/horrelakoadanirebizitza webgunean aurki daitezkenak. Galdera sorta horien helburua kolektibo honen inguruan gizarteak duen ezagutza maila neurtzea da, modu ludiko eta dibertigarrian betiere.

Bestalde, Atzegik pertsona gehiagoren esperientziak jaso nahi ditu kanpainatik kanpo, beraien bizitza nolakoa den azal dezaten. Horretarako #horrelakoadanirebizitza eta #asiesmivida Twitter traola erabili dezakete edo 609 70 37 06 Whatsapp zenbakia.