Bisigua protagonista Orion lau egunez

Uztailaren 16an hasi eta hurrengo hiru egunetan, Orioko plaza jatetxe dotore bihurtuko da hiru parrilleroen eskutik, zortzi metro luze izango dituen parrilla erraldoiarekin, besteak beste. Joxe Miel Zendoiak Orio estiloaren berri eman du eta, nahiz eta sekretu guztiak ez utzi ageriak, isilpekoren batzuk aitortu ditu: Besugerarik ez dugu erabiltzen, hori da berezitasuna. Bisiguak zabaldu eta parrillara botatzen ditugu. Azken ukitua refritoarekin ematen diogu.

Lau egun horietan sukaldea kalera aterako da eta 500 inguru bisigu zaporetsu prestatuko dituzte hiru lagunek. Halere, nahiz eta protagonista nagusia izan, plater hau ez da festako pertsonaia bakarra izango. Bisigua Orio Estilora jaialdi gastronomikoaren menua bost platerez osatua egongo da: antxoak gatzetan, tomate entsalada hegaluzearekin, zainzuriak, bisigua parrillan eta postrea jateko aukera izango dute lau egun horietan Orio bisitatzen duten zorionekoek.

Txartelak dagoeneko salgai daude Orioko Turismo bulegoan. 1.000 txartel jarriko dira salgai, 50 eurotan bakoitza. Erreserba 943 83 55 65 telefono zenbakian egin behar da. Arin ibili, segituan agortzen dira eta...