Igande honetan jokatuko da Zaldibarren Euskal Herriko Trikitilari gazteen txapelketako finala

Igande honetan jokatuko da Zaldibarren Euskal Herriko Trikitilari gazteen XXIII. txapelketako finala. Bertan arituko dira lehian Azkoitiko eta Aramaioko kanporaketetan puntu gehien lortu zituzten zortzi bikoteak. Guztiak gipuzkoarrak izango dira. Kanporaketan emaitza onena lortu zuen bikotea Lasturko Josune Arakistainek eta Debako Alaitz Eskuderok osaturikoa da. Beraiek dira, beraz, iaz eskuratu zuten txapela berriro ere etxera eramateko faborito nagusiak. 138,50 puntu lortu zituzten bi neskek. Haien atzetik, 132,60 punturekin, Julen Alonso oriotarrak eta Eneritz Aulestia zarauztarra daude; eta hirugarren lekuan Eneko Arbeo azpeitiarra eta Mireia Ibabe bergararra (131,30). Hurrengo bost bikoteak Naiara Mantzizidor eta Jugatz Oleaga (Itziar eta Aizarnazabal, 128,50 puntu), Alaitz Urdalleta eta Aiala Etxabe (Errezil eta Zestoa, 127,70 puntu); Andoni Oruesagasti eta Uxue Kerejeta (Zumarraga, 123,10 puntu), Eider eta Lierni Tolosa (Hernani, 119,70 puntu) eta Jone Urbieta eta Izaro Lestayo (Getaria, 115,50 puntu) dira.