Diario Vasco

mendi lasterketa

Lehenengo Lemoatx Trail lasterketa, larunbatean

Lemoatxako lubakiak. Guda zibiliren garaikoak dira eta duela pare bat urte berreskuratu zituzten, ibilbidean zehar ikus daitezke.
Lemoatxako lubakiak. Guda zibiliren garaikoak dira eta duela pare bat urte berreskuratu zituzten, ibilbidean zehar ikus daitezke. / Artxiboa
  • 16’5 kilometroko ibilbide «gorabeheratsua» prestatu dute Lemoatxan

Larunbat honetan jokatuko da Lemoatx Trail mendi lasterketaren lehenengo edizioa. Ganzabal Mendi Taldeak eta Lemoako Udalak antolatu dute proba. Ibilbidea 16,5 kilometrokoa da eta antolakuntzatik esaten dutenez «nahiko gorabeheratsua». 10.30etan emango zaio hasiera lasterketari. Aurretik, mendi martxa familiarra egingo da mendi lasterketa doan ibilbide berdinetik, 9.00etan hasita.

Internet bidez izena emateko epea amaitu bada ere, lasterketaren egunean irteeran bertan apuntatzeko aukera egongo da. Ibilbide polita, jai giroa, parte hartzaileetako egingo den parrillada eta kirol materialaren zozketa dira lasterketa berri honen erakargarriak.

«Etortzen direnek lasterketa berria ezagutzeko aukera izango dute. Gainera, ibilbidea gure historiaren parte batetik pasatzen da. Guda zibilaren garaian Lemoan batailak egon ziren eta azken urteetan geratu ziren trintxerak berreskuratu dira. Korrika egin bitartean ikus daitezke ibilbide bertatik igaro-tzen delako eta polita izango da», azaldu digu Jon Anderrek, Ganzabal Mendi Taldeko kideak.

Desnibel handia

16’5 kilometroko ibilbideak 800 metroko desnibel positiboa du. «Lasterketa ez da oso luzea, baina distantzia gutxian desnibel handia egiten da. Teknikaren aldetik ez da gauza zaila. Herritik atera eta Lemoatxara igotzen da bi aldiz. Hasiera asfaltokoa da eta goian ez dago lokatz asko”.

Dagoeneko 100 bat korrikalarik eman dute izena eta lasterketa egunean gehiago agertzea espero dute antolakuntzatik. Internet bitartez izen ematearen kostea 8 euroko bazen (10 federatuak ez direnentzat) lasterketaren egunean 10 euro ordaindu beharko dira (15 ez federatuak). Izen-emate bakoitzeko euro bat Hegoak Astinduz Elkarteari emango zaio, ‘piel de mariposa’ gaixotasunari aurre egiteko.

Aldaketa araudian

Araudian aldaketa bat egin zuten joan den astean eta 14-18 urte bitartekoek lasterketan parte hartzeko aukera izango dute, beti ere gurasoen baimena idatzia eramaten bada. Lemoako 15 urteko gaztetxo batek parte hartu nahi duelako egin dute.

Joan den larunbatean Lemoatx Trailaren ibilbidea ezagutzeko kedada egin zuten eta eguraldi txarrarengatik jende gutxi agertu bazen ere gauza bat argi geratu zen Jon Anderen ustetan, lemotarren artean pike handia egongo dela, alegia.

«Lehenengo hiru gizonek zein emakumeek saria izango dute eta baita Lemoako gizon eta emakume onenek ere. Lemoako txapelketa bezala izango da eta pike handia sortu da herritarren artean, baina pike sanoa. Kedadan ikusi zen azkenaldian gogor entrenatzen aritu direla. Nabaritzen da pikea». Ziur larunbatean lehia polita ikusiko dela.

Recibe nuestras newsletters en tu email

Apúntate