Zazpi lurraldeetako 13 bertsolari gazte Sarako finalean

Iaz ere Saran jokatu zen finala, eta Aroa Arrizubieta gasteiztarrak jantzi zuen txapela./BERTSOZALE ELKARTEA
Iaz ere Saran jokatu zen finala, eta Aroa Arrizubieta gasteiztarrak jantzi zuen txapela. / BERTSOZALE ELKARTEA

Gipuzkako ordezkariak Oihana Arana eskoriatzarra eta Aner Peritz 'Euzkitze' zarauztarra izango dira

Sarak hartuko du aurten ere Euskal Herriko bertsolari gazteen festa. Zazpi lurraldeetako 13 bertsolari ariko dira kantuan, zazpi mutil eta sei neska, iaz lortutako txapelaren defentsa egingo duen Aroa Arrizubieta arabarra barne. Haur eta gazteei jendaurrean bertsotan egiteko espazioak emateko sortu zen orain dela hiru hamarkada Euskal Herriko Eskolarteko bat-bateko Txapelketa. Bide luzea egin du 1989 urtez geroztik Bertsozale Elkarteak eta Ikastolen Elkarteak partekatzen duten ekimenak. Ikasturte honetako txangoa larunbat honetan iritsiko da helmugara, Saran. Bertan jokatuko da alegia 2018ko Eskolartekoko finala.

Sarako trinketean izango da bat-bateko finala, 11:00etatik aurrera. Zazpi lurraldeetako eta 15-18 urte bitarteko hamahiru bertsolari gaztek hartuko dute parte: Arabatik, Aitor Ugarte Eriz (Aramaio, 2002) eta Aroa Arrizubieta Barredo (Gasteiz, 2001); Baxenabarretik, Elixabet Etxandi Goyenetche (Izpura, 2000) eta Julen Etxeberri Etxart (Zaro, 2001); Bizkaitik, Gorka Pagonabarraga Agorria (Durango, 2000) eta Iruri Altzerreka Martinez (Garai, 2000); Gipuzkoatik, Oihana Arana Kardenal (Eskoriatza, 2001) eta Aner Peritz Manterola 'Euzkitze' (Zarautz, 2002); Lapurditik, Hodei Renteria Maleta (Angelu 2000) eta Irati Alcantarilla Urdanpilleta (Urruña, 2001); Nafarroatik, Xabat Illarregi Marzol (Leitza, 2001) eta Ekiñe Zapiain Arlegi (Bera, 2002); eta Zuberoatik, Haritz Capot Thornary (Zalgize, 2001).

Bi atal izango ditu saioak. Hasierako agurraren ondotik, binaka ariko dira zortziko handian zein txikian; eta gero, puntuazioz sailkatutako lehen seirek bakarkako ariketak egingo dituzte. Egitasmoaren 30.urteurrena tarteko, Mikel Mendizabal bertsolari eta Ikastolen Elkartean bertsolaritza sustatzaile arduratan aritu denak jantziko dio txapela irabazleari.

Temas

Euskera

Contenido Patrocinado

Fotos

Vídeos