Plentziatik Getarira, 'Itsasontzi Baten' saioaren azken atalean

EITB

Pilartxo azkenekoz hartu eta Getariara itzuliko dira, bidaia hasi zen lekuraino, uda hasieran hasi zen abentura agurtzeko

Igande honetan, irailak 24, Ibon Gaztañazpik eta Maitena Salinasek azken abentura biziko dute Pilartxo-rekin. Agur atal honi Plentzian emango diote hasiera protagonistek, eta abiapuntu izan zen Getariaraino eramango ditu itsasontziak azkenekoz.

Plentzian, Josemirekin elkartuko da Ibon Gaztañazpi. Gonbidatuak herriak bizitako arrantzarako ohituraz hitz egingo du. Maitena ez da geldirik egongo bitartean, eta piraguan ibiltzen saiatuko da neska gazte talde batekin. Ikusteko dago ea busti gabe amaitzeko gai den!

Oso hurbil, Gorlizen, bapo jateko aukera izango dute beste behin gure bi protagonistek. Hondartzape jatetxean, Jonek eta bere familiak egundoko bazkaria eskainiko diete. Agurra xamurragoa izan dadin primerako plana!

Hortik, Pilartxo lagun, Gaztelugatxera joango dira. Ibonek, urpekaritza egiteko aukera izango du han, eta ur azpian dagoen Ama Birjinaren irudi harrigarriak eskainiko dizkigu.

Ondoren, biak eskailerak igo eta Gaztelugatxeko Done Joane ermitan afari xume baina berezi bat egingo dute, eguneko azken eguzki-izpipean.

Bigarren eguna, berriz, Deban igaroko dute. Herriko San Roke jaietan murgilduko dira Ibon eta Maitena. Bertako entzierroa, prozesioa eta jai egitarauak eskaintzen dituen gainontzeko ekitaldiak gertutik biziko dituzte.

Amaitzeko, Pilartxo azkenekoz hartu eta Getariara itzuliko dira, bidaia hasi zen lekuraino, uda hasieran hasi zen abentura agurtzeko.

Hau, eta gehiago, igande honetan 22:00etan ETB1en.

Temas

Euskera

Fotos

Vídeos