Nahikoa da telefono bat erreportaje bikaina egiteko

Une honetan Australian dago irabazlea, eta handik eskertu zuen saria. /
Une honetan Australian dago irabazlea, eta handik eskertu zuen saria.

Oihane Zunzunegi 22 urteko bizkaitarraren 'Ez da erraza' lanak irabazi du I SmartBerri lehiaketako sari nagusia, eta bigarrena une honetan Haitin dagoen Jon Padilla donostiarrak lortu du

Igande honetan, apirilak 15, eskuko telefonorik gabeko eguna ospatzen bada ere, nekez irudika daiteke gure eguneroko bizitza tramankulu horiek gabe. Eta ez bakarrik deiak eta mezuak egin edo jasotzeko, askoz ere gauza gehiagotarako erabiltzen baitira telefonoak 'smartphone' bilakatu zirenetik. Esate baterako, erreportajeak egiteko...

Ikus-entzunezko kazetaritzaren euskarri eta lanketa berriei ateak irekitzen ari diren teknologia horiek ezagutzera eman eta sustatzeko asmoz, EiTBk, EHU/UPVrekin, Deustuko Unibertsitatearekin, Mondragon Unibertsitatearekin eta Nafarroako Unibertsitatearekin lankidetzan, I SmartBerri lehiaketa deitu zuen. Sariak aste honetan eman dira, aurrenekoa Oihane Zunzunegi 22 urteko gazte bizkaitarraren 'Ez da Erraza' bideoak jaso duelarik. Bigarren gelditu da Jon Padilla donostiarra, 'Haiti, bizimodua eta euskara' bideoarengatik. Hirugarren saria Ana Galisteoren 'Huertos Urbanos' lanarentzat izan da. Irabazleek eta gainerako parte-hartzaile guztiek frogatu dute, hain zuzen, telefono adimendun bat nahikoa dela erreportaje bikainak egiteko.

Epaimahaiak aho batez erabaki du Smartberri lehiaketaren lehen saria Oihane Zunzunegiren 'Ez da Erraza' bideoari ematea. Galdakaoko 22 urteko neskak Australian lanean dagoela parte hartu du lehiaketan eta bere amak, Alazne Madinabeitiak jaso du saria. Oihanek Euskal Herriko Unibertsitatean ikasi zuen Ikus-entzunezko Komunikazioa. Nepalen egon da berriki, kooperazio proiektu batean lanean, eta orain Australian dago. Queensland-etik bidali du eskerrak emateko bideoa euskaraz, bere ama hizkuntzan.

Bigarren saria, 499 euro eta plaka oroigarria, Jon Padillak jaso du 'Haiti, bizimodua eta euskara' bideoarengatik. Jon Donostian jaio zen 1989an, Ingurumen teknikaria da eta Errenteriako kontserbatorioan piano eta musika ikasketak burutu zituen. Orain, Haitin dago, Eusko Jaurlaritzaren Euskadiko Gazteak Lankidetza programaren baitan.

Hirugarren saria, Ana Galisteoren 'Huertos Urbanos' bideoak jaso du, 199 euroko saria eta plaka oroigarria. Ana Cadizeko  San Fernando herrian jaio zen, 1997an, eta duela 3 urte Sevillara joan zen Ikus- entzuneko Komunikazioa ikastera. Bere ametsa Telebista eta zinemaren munduan lan egitea da eta 'Te Toca Actuar' gobernuz kanpoko erakundearekin kolaborazioak egiten ditu diseinu grafikoaren alorrean eta Community Manager gisa.

Sekulako erantzuna

Smartphoneak ikus-entzunezko erreportajeak egiteko ematen dituzten aukerak oso zabalak dira, eta Smarberri lehiaketa martxan jartzeko arrazoi nagusia izan zen EiTBrentzat eta elkarlanean aritu diren lau unibertsitateentzat.

Aurreikuspen guztiak gainditu ditu lehiaketak, izan ere, bai bideo irabazleak zein bigarren sarituak ere, egileentzako arrotzak ziren egoera eta tokietan grabatu dira, Euskaditik milaka kilometrora. Hala ere, oso erraza egin zaie saridunei bideoa editatu eta berehala Bilboko EiTBko egoitzara bidaltzea, online konexioak eskaintzen duen berehalakotasunari esker. Geroz eta telebista kazetari  gehiago ari da smartphonea erabiltzen, notiziak grabatu, editatu eta zuzenean bere kateetako albistegietan sartzeko. Duela gutxi, Googlentzat Kantarrek egindako txostenaren arabera, Smartphonea lehen pantaila bilakatu da,  batez ere gazteentzat. Halaber, geroz eta gehiago erabiltzen den ikus-entzunezko komunikazioaren tresna ere bada.Amerikako Estatu Batuetan Ooyalak egindako ikerketaren arabera, smartphoneek onlineko bideoen %60 hartzen du.

Temas

Euskera

Contenido Patrocinado

Fotos

Vídeos