'Mundu bat ahoz aho' dokumentala, ETB1en

Alondrak, inprobisatzaile mexikarrak./
Alondrak, inprobisatzaile mexikarrak.

Kantu inprobisatuari buruzko ikus-entzunezkoa da eta mundu osoko inprobisatzaileen lekukotasunak biltzen ditu

Kantu inprobisatua ardatz duen Mundu bat ahoz aho dokumentala eskainiko du ETB1ek astelehen gauean, 22:30ean. Mintzola Ahozko Lantegiak garatu eta Lanku Kultur Zerbitzuek ekoitzitako ikus-entzunezkoak mundu osoko inprobisatzaileen lekukotasunak biltzen ditu.

Mendez mende, idatziz transmititu izan da herri baten historia ofiziala. Baina historia ofizialaren ertzetan badira bestelako ahots batzuk ere, ahoz aho hedatzen direnak eta inprobisatu diren leku eta momentu horri dagozkionak. Kantu inprobisatuak forma eta ahots ugari hartzen ditu munduko bazter bakoitzean. Baina, XXI mendean ere, zenbait gizartetan behar-beharrezkoa da liburuetan agertzen ez diren begiradak adierazteko.

Hasi Euskal Herritik eta Mexikora; Sardiniatik Kurdistanera, inprobisatzaile bakoitzak bere izaera emango dio kantu inprobisatuari; eta kantu inprobisatuak munduari begiratzeko talaia berezi bakoitzaren berri emango digu. Kantua ardatz hartuta, kultura ofizialean agertzen ez diren ahotsetan barrena bidaiatzeko aukera izango dugu dokumental honetan, eta, bide batez, kultura bakoitzak emakumearen presentziaz eta transmisioaz daukan ikuspegiaren berri izango dugu, sortzaileen bizipen pertsonalen eta hausnarketen bidez.

Ikus-entzunezkoan parte hartuko dute inprobisatzaileak dira: Maialen Lujanbio, Euskal Herritik; Dana Sofia Limon, Rebeca Limon eta Diana Laura Hernandez, Mexikotik; Mireia Mena, Herrialde Katalanetatik; Simone Moni, Sardiniatik; Zinar Ala, Kurdistandik; Karen Owen, Galestik, eta Yunet Lopez, Kubatik.

Horrez gain, Albert Casals, Ixiar Eizagirre, Begoña Guzmman eta Ruth Finnegan adituek ere hartuko dute parte.

Temas

Euskera

Fotos

Vídeos