'Gailurra Xtreme Perdido' saioaren estreinaldia ETB1en

Ibon Gaztañazpik aurkeztuko du saio berria./EITB
Ibon Gaztañazpik aurkeztuko du saio berria. / EITB

Hamabi lehiakidek zortzi etapatan Pirineotako GR11 ibilbidearen 300 kilometro egingo dituzte, Ibon Gaztañazpik aurkeztuko duen erronka handi honetan

Ostegun honetan, Ibon Gaztañazpik aurkeztutuako 'Gailurra Xtreme Perdido' lehia ikusgarria estreinatuko du ETB1ek. Pirinioak zeharkatzen dituen GR11 ibilbidearen zati bat egitera ausartuko diren 12 lagun arituko dira nor baino nor gehiago saio berri honetan.

Lehiakideen helburua mendiz mendi zortzi etapatan 300 kilometro egitea izango da. Irundik irtengo dira eta Perdido mendia izango dute jomuga. Tartean, Etxalar, Otsagabia, Zuriza, Candanchu, Panticosa eta Gorizeko aterpetxea izango dituzte etapa bakoitzaren amaiera. Gari Aristegi medikuaren eta Alberto Aierbe mendiko kontuetan adituaren laguntza jasoko dute lehiakideek lasterketa osoan zehar.

Parte-hartzaileek, bataz beste, 42 kilometro egingo dituzte jardunaldi bakoitzean, egunero maratoi bat egitearen moduko distantzia. Probaren gogortasun eta intentsitateak bakoitzaren muga fisiko eta mentalak gainditzera behartuko ditu lehikideak, eta muturreko egoerak biziko dituzte.

Bi taldeen arteko lehia izango da, eta etapa bakoitzaren amaieran, lehiakide bat kanporatuko dute. Hamabi parte-hartzaileetatik hiru baino ez dira iritsiko Monte Perdidora, eta irabazle bakarra helmugara lehen postuan iritsiko dena izango da. Garaileak 3.000 euroko saria eta Zegama-Aizkorri mendi maratoian parte hartzeko aukera irabaziko ditu.

'Gailurra Xtreme Perdido' lehiaketa honetan parte hartuko duten hamabi lehiakideak kirolariak dira: Ahintzane Kalonje, Arantxi de la Fuente, Eñaut Agirre, Ainhoa Sanz, Aintzane Argaiz, Garikoitz Nuñez, Iñaki Cobo, Manuel Lasarte, Xabier Orbegozo 'Arria V', Enara Oronoz, Sarah Ugarte eta Xabier Urrutikoetxea izango dira erronka handian parte hartuko duten hamabi lehiakide ausartak.

'Gailurra Xtreme Perdido' ostegunetan izango da ikusgai, 22:30ean, ETB1. Aste honetan ibilbide luzearen lehen etapa egingo dute Irun eta Etxalar artean.

Temas

Euskera

Contenido Patrocinado

Fotos

Vídeos