Euskal Herriko familia-sagak, argitara

ETBko aurkezleak, programazio berria aurkezten/
ETBko aurkezleak, programazio berria aurkezten

'Sagak' saioaren estreinaldiaren aurreko erreportaje berezia ikusi ahalko da ETB1en, Euskal Herriko familiei eta abizenei buruzkoa. Gainera, 'Gailurra Xtreme Perdido', 'Merlí, 'Arte[faktua]' eta 'Bago!az', 'El Conquistador del Caribe' eta 'El Conquis'en edizio berriak estreinatuko dituzte

DV

'Sagak' saio berriaren estreinaldiaren aurretik, Euskal Herriko sagei, familiei eta abizenei buruzko atariko saio berezia eskainiko du Kike Amonarrizek. Asteazken honetan, urtarrilak 10, 'Sagak' saio berriaren estreinaldia baino astebete lehenago, erreportaje berezi bat eskainiko du ETB1ek. Kike Amonarriz aurkezleak Sara Cozar, Ibon Gaztañazpi, Xabier Euzkitze, Euskaltzaindiako onomastika zerbitzuko Mikel Gorrotxategi eta Euskal Museoko Amaia Mujika izango ditu alboan.

Bidelagun hauekin, saga ezberdinak ezagutzeaz gain, familiei, sagei eta abizenei buruz hausnartzeko parada eskainiko du erreportajeak. 'Sagak' saio berezia asteazken honetan 22:30ean izango da ikusgai, ETB1en.

'Sagak' saioaz gain, ordea, asko dira ETBk negu honetarako prestatu dituen nobedadeak.

Eduki berriak

Saio eta eduki berriak dakartza 2018. urteak ETBra. Estreinaldien artean, 'Sagak', 'Gailurra Xtreme Perdido', 'Merlí' eta 'Arte[faktua]' daude. Halaber, edizio, lehiakide, gonbidatu eta eduki berriekin iritsiko dira 'Bago!az', 'El Conquistador del Fin del Mundo' eta 'El Conquis' saioak. Tarte horiek guztiek entretenimendua, hurbiltasuna eta informazioa ardatz duen programazioa osatuko dute.

'Gailurra Xtreme Perdido' saioan, erronka eta lehia ikusgarria aurkeztuko ditu Ibon Gaztañazpik. Bidelagun izango ditu, halaber, Gari Aristegi medikua eta Alberto Aierbe mendiko kontuetan aditua. Pirinioak zeharkatzen dituen GR11 ibilbidearen zati bat egitera ausartuko diren 12 lagun arituko dira nor baino nor gehiago. Lehiakideen helburua mendiz mendi zortzi etapatan 300 kilometro egitea izango da. Irundik irtengo dira eta Perdido mendia izango dute jomuga. Tartean, Etxalar, Otsagabia, Zuriza, Candanchu, Panticosa eta Gorizeko aterpetxea izango dituzte etapa bakoitzaren amaiera. Parte-hartzaileek, bataz beste, 42 kilometro egingo dituzte jardunaldi bakoitzean. Urtarrilaren 11an aurkezpen saioa ikusi ahal izango dugu eta 25ean ekingo diote lehiari.

Igandeetan, 'Herri Txiki, Infernu Handi'ren aurretik, 'Merlí', Francesc Orella aktorea protagonista duen TV3ko telesail arrakastatsua izango da ikusgai urtarrilaren 14tik aurrera. Telesailaren bi denboraldiak emango ditu ETBk. Merlí filosofia irakaslea du protagonista, eta ikasleak askatasunez pentsatzera bultzatuko ditu, ezohiko irakasbideak erabiliz. Horren metodoek ez dute inor epel utziko, eta aldekoen eta aurkakoen artean banatuko dira ikasle, irakasle eta gurasoak.

Bestalde, ETB1ek laster 'Bago!az' talent show-aren bigarren edizioa estreinatuko du Zuriñe Hidalgok aurkeztuta. Aurten ere irabazleak ostiralero ikusgai daukagun 'Go!azen' telesail arrakastatsuaren hurrengo denboraldian parte hartzeko txartela irabaziko du, aurreko edizioan Iholdi Beristainek lortu zuen bezala. Halaber, astelehenetik ostegunera ematen den 'Gure Kasa' saioak, Julen eta Antton Telleriak aurkeztuta, entretenimendua, gonbidatu ezagun eta ezezagunak, euskal musika taldeak eta umorea ditu ardatz nagusi.

Datorren otsailaren 3tik aurrera, 'Arte[faktua]' literatur saio berria emango du ETB1ek Yolanda Mendiolak aurkeztuta. Atal ugari izango ditu: nagusia, idazle bati bere lana, unibertsoa, pentsamendua eta motibazioa ezagutzeko egindako elkarrizketa izango da. Baina, orobat, gonbidatuak, nobedadeak, irakurle eta liburu-saltzaileen gomendioak eta booktuberrenak agertuko dira. Horrek guztiak osatuko du 'Arte[faktua]'; literatura, liburuak, idaztea eta irakurtzea maite duten guztiei zuzendutako programa.

Asteartero 'Ur Handitan' saioak, berebat, erreportaje interesgarriak iragartzen ditu. Eta igandero, jakina, 'Herri Txiki, Infernu Handi' saioak bere bidea egiten jarraituko du Euskal Herrian barrena. Araitz Nafarroan, Ereñozu Gipuzkoan eta Mendata Bizkaian izango dira, hain zuzen ere, hurrengo jomugak.

Temas

Euskera

Contenido Patrocinado

Fotos

Vídeos