Berri Txarrak taldea, 'Ur Handitan' saioan

Hirukoa, promozioko argazki batean./
Hirukoa, promozioko argazki batean.

25 egunen buruan sei herrialdetan 17 kontzertu eman ondoren, lur hartu eta Euskal Herrian antolatu duten kontzerturik handienaren prestaketan daude taldeko kideak

Berri Txarrak taldea izango da astearte honetan 'Ur Handitan' saioaren protagonista. 25 egunetan sei herrialdetan 17 kontzertu eman ondoren, lur hartu eta Euskal Herrian antolatu duten kontzerturik handienaren prestaketan daude Berri Txarrak taldeko kideak. Larunbat honetan, martxoaren 17an, BECen 10.000 pertsona baino gehiago elkartuko ditu emanaldiak.

Gorka Urbizu, David Gonzalez eta Galder Izagirre, nazioarteko aretoetan euskarazko rock musika zabaldu duten hiru musikari profesionalen bizitza ezagutzeko asmotan, Lekunberri, Bilbo eta Hondarribira gerturatu da saioa.

Mende laurdena beteko duen musika talde honek Lekunberri du sorterri. Eskola garaietan, 14 urterekin, lagunekin batera hasi zen Gorka Urbizu lehen rock gitarrak astintzen.

Hasiera haiek ongi gogoan ditu Aitor Orejak, hasiera haietan taldearen gitarra jotzaile izandakoak. Urte haiek taldean pasatako garai onenak izan ziren gitarra ohi Orejarentzat, garai onenak eta inozenteenak. Bere bizitzako taldean hamar urte igaro ondoren, erabaki bat hartu behar zuen: aurrera jo edo taldea utzi. Azken hori egitea erabaki zuen. Ez zitzaion batere erraza egin, ordutik ez baita taldearen kontzertu bakarrera joan, "zaila da niretzat", dio berak. Oraindik ere bihotzean duen taldeak sentsazio gazi-gozoak sorrarazten dizkio, "eurak hor daude eta ni ez, eta hori momentu batzuetan ez da erraza".

David Gonzalez musikari profesional gisa sartu zen Berri Txarraken. Nerabezaroan futbolean buru-belarri zebilenean, haren anaiak baxu bat etxera sartu zuen etxean, eta horrek bere bizitza goitik behera aldatu zuen. Taldekideek oso izaera ezberdinak dituzte: Gorka tipo lasai eta inteligentea da, Galder makina bat da, eta David bera urduri eta profesionala.

Galder Izagirrerentzat musika pasio bat izan da. Baina, ibilbidea argazkilaritzara bideratzea zuen asmo gisa Berri Txarraken deia jaso zuenean. Istant berean erabaki zuen, zalantzarik izan gabe, taldearen parte izan nahi zuela. Geroztik, munduan zehar bateria astintzen ibiltzeaz gain, taldea erretratatzen dihardu.

David eta Galder Izagirre aita dira eta halako talde baten parte izateak euren bikoteentzat, euren aitatasunean eta euren etxean zer suposatzen duen ere kontatuko digute. Arrantzaleen bizitzarekin alderatu dute, gogortasunagatik eta etxean daudenek dituzten beharrengatik.

Eta etxeko giro horretan murgilduta, Gorkaren arreba Nerea Urbizuk argi utzi digu bere etxean musika familia-kide bat gehiago zela. Anaia pertsona itxi, lotsati, azkar eta umil gisa definitzen du. Etxean eta eszenatokian erabat aldatzen da Gorka, zuritik beltzera eta hankak beti izan ditu lurrean, arrebaren begitan.

Berri Txarrak musika taldeari buruzko saioa, beraz, astearte honetan, 22:30ean, ETB1en.

Temas

Euskera

Contenido Patrocinado

Fotos

Vídeos