Diario Vasco

Ainara Azpiazuren hitzek marraztuko dute Hitzetik Hortzera

Ainara Azpiazuren hitzek marraztuko dute Hitzetik Hortzera
  • Komiki eta ilustrazio munduez eta bertsolaritzarekin duen harremanaz jardungo da

Bertsolaritzarekin daukan harremanaz eta egiten duen lanaz mintzatuko dira 'Axpi'-rekin. Eta bi bertso-saiotako aleak ere eskainiko dituzte: martxoaren 9an Durangon Bertso Korrikaren barruan Igor Galartzak, Nerea Ibarzabalek, Oihana Bartrak eta Eneko Abasolo 'Abarkas'-ek osatu zutena eta biharamunean Usurbilen Uxue Alberdik, Onintza Enbeitak eta Ane Labakak egindakoa.

Aurpegi ezaguna da Ainara Azpiazu 'Axpi' ilustrazio eta komikigintza munduan. Berrian, H28n eta Hernaniko Kronikan zintak egin izan ditu, eta hainbat kartelen egile ere bada, tartean, baita hainbat bertso-saiotakoak ere. Bera izango da aste honetako programako gonbidatua, eta komiki eta ilustrazio munduez eta bertsolaritzarekin duen harremanaz jardungo da.

Andoni Egaña tatuaia egile

Marrazkiei lotuta egongo da aste honetako bertsoaldi historikoa ere. 1998ko apirilaren 4an bertso jaialdia egin zuten Seguran. Egun hartan gai-jartzaile lanetan aritu zen Maialen Lujanbiok tatuaia egile paperean jarri zuen Andoni Egaña; eta Mikel Mendizabali, Gregorio Larrañaga 'Mañukorta'-ri, Joxe Agirreri, Anjel Mari Peñagarikanori, Sebastian Lizasori eta Iñaki Muruari larruazalean ze marrazki egin zizkien kantatu zuen.

Bertso Korrika Durangon

Bertsozale Elkartearen eta AEKren elkarlanetik sortutako proiektua da Bertso Korrika. Korrika aitzakiatzat hartuta, tokian tokiko bertso-eskola eta euskaltegiak harremanetan jarri eta bertso saio bereziak antolatzen dituzte. Hirugarren edizioa bete du aurten ekimenak. Martxoaren 9an ziklo honetako saio bat egin zuten Durangoko Plateruena Kafe Antzokian. Erika Lagoma gai-jartzaileak jarritako ariketak fin bete zituzten Eneko Abasolok, Igor Galartzak, Nerea Ibarzabalek eta Oihana Bartrak.

Urteroko hitzordua Usurbilen

Biharamunean, martxoaren 10ean alegia, Usurbilgo Artzabal jatetxean izan ziren Hitzetik Hortzerako kamerak. Martxoaren 8aren bueltan bertso afari berezia antolatu ohi dute urtero. Idazle desberdinen testuetatik abiatuta jarri zituen gaiak Maider Arregik, eta umorez erantzun zuten Uxue Alberdik, Onintza Enbeitak eta Ane Labakak. Bertsoaldi onenak eskainiko ditugu igande honetan.

Igande honetan izango da ikusgai ETB1en, 15:00etatik aurrera. Eta interneten, EITB Nahieran-en.

Temas

Recibe nuestras newsletters en tu email

Apúntate