Diario Vasco

'Xora' ezagutzeko edo berreskuratzeko aukera

2012ko filmeko irudi bat.
2012ko filmeko irudi bat. / XORA/YOUTUBE
  • Zubereraz errodatutako lehen fikziozko film luzea ikusgai astelehen honetan ETB1eko 'Zinez' saioan

Oso murriztailea litzateke Peio Cachenautek idatzi eta zuzendutako 'Xora' filma soilik kontsideratzea zubereraz errodatutako lehen fikziozko luzemetraia, ezaugarri hori alde batera utzita ere film eder eta berezia baita; ederra zentzu berezian alegia. Edertasun eta berezitasun horri ekarpen handia egiten dio gainerako euskarak darabiltzatenek gutxitan entzuten duten Zuberoako hizkerak, baina bestelako osagai interesgarririk badu filmak.

2012. urtean estreinatua, Euskal Herriko areto dezetentan ikusi ahal izan zen. DVDan ere atera zuten gero. Astelehen honetan, beraz, ikusi zutenek berreskuratu ahal izango dute ETB1en, eta bere garaian filma ikusi gabe gelditu zirenek 'Xora' ezagutzeko aukera izango dute, Fermin Etxegoienek aurkezten duen 'Zinez' saioan. Aurkezpena 22:20ean egingo da, eta bost minutu geroago hasiko da filma.

Aurrekontu oso txikiarekin egindako pelikulak bi protagonista nagusi ditu, bien gainetik nagusitzen dela Zuberoa bera, eta ez bakarrik paisaia eta hizkeraren kontura. Bata da idazle izan nahi duen eta erabaki bat ezin hartuta dabilen mutil gaztea, X, Jef Goihenexpek jokatua; bestea haren osaba idazlea, 'Hollywood', Ttittika Recalt antzezle lanetan maiz ibilia den irrati esatariak interpretatua. Bien arteko elkarrizketek osatzen dute filmaren ardatza, horiek bideratzen baitituzte estetikaren eta erritmoaren aldetik ere berezia den pelikulak lantzen dituen gai ugariak.

Temas

Recibe nuestras newsletters en tu email

Apúntate