Diario Vasco

'3txulo Zuzenean', astelehenetik ostiralera, hilaren 13tik aurrera

Tarteka, platora ere hurbilduko dira umeak.
Tarteka, platora ere hurbilduko dira umeak. / ETB
  • Xbelek eta Gorritxok gidatuko dute saioa eta 19:30etik 20:30era eskainiko da ETB3n

'3txulo Zuzenean' saioa estreinatuko da otsailaren 13tik aurrera ETB3n. Xbel (Zuriñe Hidalgo) eta Gorritxo pertsonaiek gidatuko dute, eta 19:30etik 20:30era eskainiko da zuzenean, astelehenetik ostiralera. Horrez gain, orain arte bezala, goizean eta eguerdian ere '3txulo' saioa izango da ikugai.

ETBk azaldu duenez, «3txulotarren asmoa, kezka eta helburua Euskal Herriko haurrekin bat egitea izan da hasieratik, eta orain, zuzeneko saio honekin, harremana askoz ere estuagoa izango da. Umeek zuzenean parte hartzeko aukera izango dute telefonoz, eta baita tarteka platora gerturatuta ere».

Eduki berrion artean lehiaketa bat dago. Telefonoz, Xbelek proposatuko dizkien jokoetan parte hartu, eta tarteka sariak irabazteko aukera izango dute haurrek. '3txulo'ko pertsonaien inguruko galderak, jolasak, asmakizunak eta abar izango dira. Zuzenean parte hartzeko ezinbestekoa izango da Hiru3 klubeko bazkide izatea.

Zuzeneko albistegia ere izango da saioaren barruan. Egunero hiru berri emango dituzte, eta umeek hiruetatik gezurretako albistea zein izan den asmatu beharko dute. Tarteka umeei eta gonbidatu bereziei zabalduko diete platoa, batez ere haurrei. Dantzatzeko, kantatzeko, dakizkiten bitxikeriak erakusteko eta programako pertsonaiak ezagutzeko, besteak beste.

Astero-astero Xbelek herri bateko ikastetxe bat bisitatuko du. Bertako ikasleen eskutik, eskola ezagutuko ahal izango da: ikasgelak, jangelak, baratzak, musika aretoa, antzerki taldea... Bertako maisuak ezagutuko ditugu, eta eurekin jolasteko aukera ere izango da.

Xbelek Euskal Herri osoa zeharkatuko du bere jakin-mina asetzeko. Bere erreportajeen bitartez, esate baterako, kandelak nola egin, liburu bat nola inprimatu, zuhaitz bat nola landatu, behiak nola jetzi, zenbatero jaten duten Aquarium-eko marrazoek… Hamaika gauza ikasiko dute haurrek.

Xbelek kantatzen bukatuko du egunero saioa. Doinu ezagun bat erabiliz, egun horretan saioan ikusi eta ikasitakoa laburtuko du.

Eta berrikuntza hauetaz aparte, betiko tarte arrakastatsuak ditu saioak: 3txulotarren abenturak, orain arte bezala umore, jakingarri, balore eta batik bat dibertsioaz hornituta.

Pertsonaia berri bat ere izango da '3txulo' saioan: 6Khan, Xbelek bere etxean jaso duen etorkina. Hainbat tirabira, gaizki ulertu eta trama desberdin sortuko ditu pertsonaia berriak.

Horrez gain, zorion tartea izango dute. Egunero sorpresa galanta emango diote etxean saioari begirik kendu gabe dagoen eta urteak betetzen dituen 3txulotar horri.

Berebat, sukaldeko sekretuak eta errezeta errazak, eskulan ikusgarriak, liburuen gomendioak… eduki horiek guztiek osatuko dute saioa.

Temas

Recibe nuestras newsletters en tu email

Apúntate