Diario Vasco

'Baserri'-k eta 'Txankarra'-k moderno izan nahi dute

'Baserri'-k eta 'Txankarra'-k moderno izan nahi dute
  • Lekeitioko arrantzaleak, jubilatu itxura alde batera utzi, eta 'gaztetzeko' prozesuan sartuko dira

Manu Zatika 'Baserri'-k eta Dani Robles 'Txankarra'-k espirituz gazte baina itxuraz zaharkituta daudela pentsatzen dute. Horregatik, Maitane Segurolaren laguntzaz, euren itxura goitik behera berritzeko prozesua hasiko dute asteleheneko  saioan. Lehenik eta behin, modan dagoen ileapaindegi batera joango dira, orrazkera aldatzera. Aldaketa estetikoekin jarraituz, estéticienne batek gorputzean soberan dituzten iletxoak kendu eta manikura egingo die.

Alkandora koadrodunak alde batera utzi eta modan dauden jantziak erostera joango dira Unai Goikolea personal shopperraren laguntzaz. Txankarrarentzat, bere gorpuzkerarengatik, western ukituko jantziak omen dira egokienak. Baserrirentzat, berriz, moda italiarra.

Estetika aldaketarekin gustura geratuko dira, pozik. Baina gazte itxura edukitzea, gaztetasunaren iturritik edatea, batzuetan, 'mingarria' izan daitekeela konprobatuko dute berehala. Mingarria eta bizitza osorako aztarnak utz ditzakeena. Maitanek tattoo bana egitera eramango ditu. Hasierako erreparoak gaindituta, tatuaje bana egitera ausartuko dira bi jubilatuak. Zer tatuaje? Non? Hemen ere sekulako ezustekoen lekuko izango gara.

Moderno izateko bidaia liluragarri honetan, itxura aldatzeaz aparte, beste hainbat gauza aldatu beharko dituzte Baserrik eta Txankarrak: keinuak, hizkera, gorputz-espresioa... Horretarako dantza ikastaro trinko bat egingo dute, baina ez edonolako dantza, hip-hopa dantzatzen ikasiko dute, gazte pare bati dagokion gisa.

Ez al da hau guztia gehiegi izango Baserri eta Txankarrarentzat, 'gazte' izateko prozesuan? Politikariek esaten duten moduan, ez al dute 'marra gorri'ren bat zeharkatuko? Bai, bi neraberen moduan MacDonald?s batera joan beharko dute afaltzera. Menestra, bakailaoa, txuleta eta horrelakoak ahaztu eta Big Mac, nugget, McFlurry eta horrelakoei aurre egin beharko diete bertan.

Amaituko al dute aldaketa prozesu guztia? Astelehen honetan ikusi ahal izango da 'Baserri, Txankarra & Maitane' saioan, 22:15ean ETB1en.

Temas

Recibe nuestras newsletters en tu email

Apúntate