Diario Vasco

Etxebizitza mota ezberdinak aztergai, 'Batek Daki' saioan

Belaontzi bat ere bilaka daiteke etxebizitza.
Belaontzi bat ere bilaka daiteke etxebizitza. / ETB
  • Lastozko etxe bat, etxe okupa, ikasleen pisu bat, komentu bat edota belaontzi bat ezagutuko ditu Aitziber Garmendiak

Etxebizitza baten funtzio nagusia gizakia arrisku ezberdinetatik babestea eta honi aterpea ematea da; eguraldi txarra, basapiztiak, edota beste gizaki batzuk. Historiaurreko gizakiak kobak erabili zituen hotzetik eta erasotzaileetatik babesteko. Ameriketako indiarrek larruz egindako dendak, eskimalek igluak, euskaldunak baserriak. Dena dela, ez da jende dena ustez garaiari eta tokiari dagokion etxebizitzan bizi eta hauetako batzuk bisitatzeko aukera izango du Aitziber Garmendiak asteleheneko 'Batek Daki' saioan. Biziko zinateke honelako etxebizitza batean?

Lastozko etxeak ez dira ipuinetako kontuak besterik; bizi errealean ere badaude horrelako etxeak. Hiru txerritxoetako bat izango balira bezala Iban Paino eta Estitxu Garcia lastozko etxe batetan biziko dira gutxi barru. Erabat ekologikoa den etxe batean. Dena dela, ipuinean gertatzen ez den bezala, etxe honi otsoaren putzak ez lioke eragingo.

Pentsatu duzue zenbat ordaintzen dugun etxe batean bizitzeagatik edo etxe baten jabe izateagatik? Alokairua edo hipoteka, argia, ura, portaleko kuota, zerga ezberdinak... Badira zenbait pertsona ez dutenak ezer ordaindu beharrik. Adibide garbia Joseba da, Tolosako Bonberenean bizi da okupa bezala. Etxe honek irrati estudioa eta guzti du.

Komunitatean bizitzea ez dago bat ere gaizki, bakoitzak ahal duen neurrian edo dituen abilezien arabera laguntzen du taldean. Modu honetan eta lasaitasunez inguratuta bizi den talde bat Donamaria komentuko klausurako mojak dira. Harrigarriak benetan moja langile eta alai hauek. Nola moldatuko da Aitziber komentuaren barruan?

Pisu arrunt bat konpartitzea oso ideia ona da gastuak murrizteko, dena den, lasaitasuna eta intimitatea galtzeko arriskua egon daiteke. Bizitzeko modu hau oso ohikoa da ikasle unibertsitarioen artean eta aste honetan Arabako, Bizkaiko, Gipuzkoako eta Iparraldeko lau ikasle ezagutzeko aukera izango dute. Zer izango dute hozkailuan? Nola moldatuko dira etxeko garbiketa egiten?

Itsasoa gustuko ez dutenentzat desegokia izan daitekeen etxe bat ezagutzeko aukera izango dute Jon Arrazolari esker. Getariako portuan amarratuta dagoen, baina itsasora egunero joaten den belaontzi batean bizi da urteko zenbait hilabetetan. Belaontziak hiru gela, sukaldea, egongela eta komuna du; etxe bat itsasoko ur gainean.

'Batek Daki' astelehen honetan emitituko da 22:15ean ETB1en.

Temas

Recibe nuestras newsletters en tu email

Apúntate