Trikitilari gazteen talentuaren eta ekarpenen bila

'Barruan dugun umea'-ren bideoklipa egiteko aukera izan zuten Eneritzek eta Julenek./EHTE/YOUTUBE
'Barruan dugun umea'-ren bideoklipa egiteko aukera izan zuten Eneritzek eta Julenek. / EHTE/YOUTUBE

Maketa lehiaketa antolatu du bigarrenez Euskal Herriko Trikitilari Elkarteak

2017an deitu zuen aurreneko aldiz Euskal Herriko Trikitixa Elkarteak 25 urtetik beherako trikitilariei zuzendutako maketa lehiaketa, eta deialdiaren emaitza izan zen iazko Durangoko Azokarako prest izan zuten 'Haziak' diskoa, non aurkeztutako abesti onenak bildu zituzten. 'Barruan dugun umea' abesti irabazlea aurkeztu zuten Julen Alonsok eta Eneritz Aulestiak, gainera, EHTEren YouTubeko kanalean ikus daitekeen bideoklip bat grabatzeko aukera ere izan zuten. Diskoa osatzeko gainerako hautatuak izan ziren Ttipika taldea, Egurre taldea eta lagunak, Irati Gutierrez, Andoni Oruesagasti eta Uxie Kerejeta, Olatz Alberdi eta Idoia Asurmendi, Beñat Zaton eta Hor Dun Koxka taldea.

Aurreneko edizioak izan zuen arrakasta ikusita, bigarrena antolatzea erabaki du Trikitixa Elkarteak. Bigarren maketa lehiaketa 25 urtetik beherako musikari edo ikasleei zuzendua dago; hau da, 1993tik aurrera jaiotakoei. Abestia grabatzeko edozein instrumentu erabili liteke, baina ezinbesteko baldintza izango da tartean trikitixa edo/eta panderoa agertzea. Horrez gain, abestiak inon argitaratu gabea izan behar du. Edozein talde formatutan sortutako piezak onartuko dira (bakarka, bikoteka, taldeka…) eta talde bakoitzak nahi adina pieza aurkeztu ditzake, nahiz eta bakoitzeko pieza bakar bat aukeratuko den diskoaren grabaketarako. Abesti bakoitza bideoz grabatuta aurkeztu behar da, ahalik eta kalitate onenean eta taldeko partaide guztiak zuzenean jotzen azaltzen direla.

Aurkezten diren talde guztietatik 10 aukeratuko dira eta horien abestiekin CD bat grabatuko da 2018ko ekainaren erditik aurrera. Hamar talde horietatik, bat aukeratuko da eta bideoklipa grabatzeko aukera emango zaio. Ondoren weberatu egingo da. Bideoa trikitixa@trikitixa.eus helbidera bidali behar da 2018ko maiatzaren 14a baino lehen. Emaitza maiatzaren 31ean argitaratuko da elkartearen webgunean.

Temas

Euskera

Contenido Patrocinado

Fotos

Vídeos