Saio irekiak egingo ditu Donostian Bergarako Idazle Eskolak

Urrian aurkeztu zuten Donostian XV. edizioa Itziar Gomez, Jose Migel Uribarren, Tere Irastortza, Pako Aristi eta Igor Arrizabalagak./
Urrian aurkeztu zuten Donostian XV. edizioa Itziar Gomez, Jose Migel Uribarren, Tere Irastortza, Pako Aristi eta Igor Arrizabalagak.

Irakurraldi, solasaldi eta tailerrak izango dira asteazkenean, ostiralean eta larunbatean San Telmo museoan

Iazko urrian Donostian egin zuten aurkezpenean, 15. edizioan Bergarako Idazle Eskolak berrikuntzak ekarriko zituela aurreratu zuten ekimenean parte hartzen duten eragileen ordezkariek. Idazle Eskola, hain zuzen, Bergarako UNEDen eta Eusko Ikaskuntzari atxikitako Asmoz Fundazioaren ardurapeko bi ikaskurteko graduondoa da, zenbait moduluren bidez maila akademiko apalagoko prestakuntza ere eskaintzen duena.

Ikasturtea amaitzeko bi aste falta direla, Donostiara itzuliko da Idazle Eskola, asteazkenean, ostiralean eta larunbatean San Telmo Museoan egingo diren irakurketa eta solasaldien bitartez.

Aurreneko saioa asteazkenean egingo da, apirilaren 18an. Saio bikoitza izango da. Aurrena, 18:00etatik 19:00etara bitarteko irakurketa- solasaldian, eskolako arduradun Tere Irastortzak 'Txoriak dira bederatzi' bere azken liburuko pasarteak irakurriko ditu. Saiakeratik hurbil dagoen dietario poetiko modukoa, gogoeta laburrez osatua, Pamiela etxearekin plazaratu zuen iazko abenduan. Pamielako J.A. Irigarai editorea izango du hain zuzen alboan irakurraldian. Ondoren, 19:00etatik 20:00etara, Ilunabar Literarioa izendatu duten tartean, euren lanak irakurriko dituzte Bergarako Idazle Eskolako Kideek.

Bigarren saioa ostiralean egingo da, apirilaren 20an, eta kasu honetan helburua izango da bikoitza. Hala, 19:00etatik 20:00etara eskolako irakasle den Pako Aristiren 'Arrotz eta eder' poema-liburuaren irakurraldia egingo da. Egileak eta Itziar Gomez aktore-zuzendari eta Idazle Eskolako kideak hartuko dute parte. Horrez gain, Karmele Igartua Sorkuntza bekaren oinarrien aurkezpena egingo da.

Amaitzeko, ikasturtean zehar larunbat goizetan Bergaran egiten diren saioen estiloko saioa egingo da apirilaren 21ean San Telmon. Saio irekia, jakina, 10:00etan hasi eta 14:00ak aldera amaituko dena. Lehen orduan, 10:00etan, 'Poesia idaztea: erritmoak eta espazioa' gaia landuko du Tere Irastortzak. 11:00etan, ipuinak kontatzen ikasteko tailerra gidatuko du Itziar Gomezek, eta atsedenaldirako eta galderak egiteko unea helduko da 12:00etan. 12:30etik 13:30era ipuinak idazteko tailerrean parte hartu ahal izango dute bertaratuek, Pako Aristiren eskutik, eta galderetako unea zabalduko da ondoren.

Temas

Euskera

Contenido Patrocinado

Fotos

Vídeos