Ravelen boleroa konpainia ezin hobean dabil Europan barrena

Ezkerretik eskuinera, Thierry Biscary, Harkaitz Martínez de San Vicente, Labeque ahizpak eta Mikel Huarte./
Ezkerretik eskuinera, Thierry Biscary, Harkaitz Martínez de San Vicente, Labeque ahizpak eta Mikel Huarte.

Katia eta Marielle Labeque pianojoleek Oreka TX, Eñaut Elorrieta eta Thierry Biscary izango dituzte bidaide

Katia eta Marielle Labeque ahizpak Lapurdin dituzte sustraiak, Baionan jaioak baitira, bi urteren aldearekin. Maurice Ravelek ere bai, Ziburun jaio baitzen 1875ean. Azken urteak zeharo garraztu zizkion eritasun baten ondorioz 1937an hil zen musikari lapurtarra ez zen izan konpositore bereziki oparoa. Goi-mailakoa bai, pieza gogoangarri ugari sortutakoa, nahiz eta askorentzat pieza bakar baten kontura izan ezaguna: 1928an Ida Rubinstein dantzari errusiararren eskariz sortutako 'Boléro'-ren kontura, alegia.

Asko idatzi da dantzarako sortu eta dantzan estreinatu zen obrari buruz (orkestrarako bertsioa aurrerago estreinatu zen). Baditu miresle sutsuak, eta gorrotatzaile are sutsuagoak. Eta batzuentzat hipnotikoa este bestetzuentzat errepikakorra den piezak interpretazio desberdinak ere izan ditu.

Eta horixe egin dute musika klasikoaren eremutik abiatuz euren gaitasuna eta ahalmen sortzailea beste esparru batzuetara eramateko prest beti egon diren piano-jole lapurtarrek. Oraingo honetan, beraien eta Maurice Ravel-en euskal sustraiak bide, XX. mendeko musikaren erreferentzia den 'Ravelen Boleroa'-ren berrirakurketari ekin diote, Hendaiako Kalapita Produkzioak etxearen eskutik.

'Basque Ravel Bolero'

'Basque Ravel Bolero' bataiatu eta euskal sustraiak nabarmentze aldera, ikuskizuna euskal musikari eta abeslariekin elkarlanean ondu dute Labeque ahizpek: Oreka TX-ko Harkaitz Martinez de San Vicente eta Mikel Ugarte txalapartariak, Kalakan taldeko abeslari izandako eta Kalapitaren sortzaile Thierry Biscary eta Ken Zazpiko Eñaut Elorrietaren ahotsekin gorpuztu dute, beraien bi pianoak eta Raphael Seguinierren perkusioarekin bat eginez.

Uztaila eta urria bitartean hitzartuta dituzten kontzertuetan Austria, Alemania, Frantzia eta Suitzan taularatuko dute ikuskizuna eta Europako hainbat jaialdi esanguratsutan jotzeko aukera izango dute: Alemania osoan zehar hedatzen den Schleswig-Holstein Musik Festival erraldoia, Festival Pianoscope, Sion festival edo Jazz In Marciac ospetsuan. 1978az geroztik abian den jaialdiak milaka pertsona erakartzen ditu Gaskoniako bastida horretara. Aurtengo gonbidatu berezien artean Herbie Hanckok, Jorge Benson, Gregory Porter, Wynston Marsalis, Chucho Valdés, Manu Dibango edo Ibrahim Maaluf izar handiak aurki daitezke.

Pasa den ostiralean, hilak 28, izan zen jaialdiaren irekiera eta programa bikoitz batekin eman zioten hasiera: 'Basque Ravel Bolerok' zabaldu eta Norah Jones estatubatuar pianojoleak osatuta. Radio France-ekin elkarlanean sustatzen da jaialdi hau eta irekiera kontzertua grabatu eta uhinetatik ere zabalduko da, entzulegoa izugarri ugarituz.

Diskoa ere bai

'Basque Ravel Bolero' zuzenekoez harago hedatuko da, eta ez bakarrik irrati bidez, abian baita diskoaren grabaketa. Labeque ahizpek Erroman duten estudioan, Donostiako Elkar estudioan eta Aizkoitiko Santa Cruz konbentuan grabatzen ari da, besteak beste.

Grabaketan XVI. mendetik honako euskal konpositoreen hainbat lanen berrirakurketak jasoko dira: Sarasate, Ravel, Aita Donostia eta beste. Eta Deustsche Grammophon zigilu aitzindariak argitaratuko du.

Labeque ahizpak 40 lanetik gora dituzte, beraien lanak eta elkarlanak batuz. Gorendu zituen Gershwin's Rhapsody in Blue-ren irakurketa garaikidearen diska Urrezko Diska lortu zuen lehenengo musika klasiko diskoen artean dagoela nabarmendu behar da.

Temas

Euskera

Contenido Patrocinado

Fotos

Vídeos