'Pasaiako Badia' dokumentala datorren astean estreinatuko da

Filmaketari dagokion argazkia.

Poliziak bost pertsona hil zituen 1984ko segadaren ingurukoak bildu ditu, lekuko, senitarteko, aditu eta garaiko politikarien lekukotasunak bilduta

1984ko martxoaren 18an, Donostian atxilotu zuen Poliziak Rosa Jimeno eta, torturapean, Iparraldean zeuden Komando Autonomo Antikapitalistetako kideekin zita bat jartzera behartu zuten. Hitzordua biharamunerako egin zuten, martxoaren 19rako, Pasaiako badiako harkaitzetan. Seinalea egitean, hakaitzetara hurbildu zen iparraldetik zetorren zodiaka, Rosa Jimeno Poliziak zeukala jakin gabe. Sekulako tiro-zaparrada pean hil ziren segituan Pedro Mari Isart eta Jose Mari Izura. Joseba Merino, Rafael Delas eta Dionisio Aizpuru atxilotu egingo ditu Poliziak. Delas eta Aizpuru harkaitzetan bertan hilko dira. Bertsio ofizialaren arabera, enfrentamendu bat izan zen. Gainerako bertsioe guztiek diote afusilatu egin zituztela. Gorpuei 113 bala zulo zenbatu dizkie Pako Etxeberria forentseak…Iaz, 2016. urtean, Donostiako Auzitegi Probintzialak, hilketa zantzuak daudela aitortu arren, kasua behin betirako artxibatu zuen. Ezin izan omen dituzte identifikatu delituaren egileak…. Senideek Estrasburgora jotzeko asmoa adierazi dute.

Bien bitartean, ahazten eta zahartzen zihoan gertakari latza berpiztu egin du datorren astean, urriaren 24an, Iruñeko Golem Baiona zinemetan estreinatuko den 'Pasaiako Badia' dokumentalak. Pasaiako segada oinarri duen dokumentala arratsaldeko 20:00retan emango da. Aurretik, Yuri Agirre, Xabier Otamendi eta Erik Aznal, dokumentalaren zuzendariek, sarrera labur bat egingo dute, dokumentalaren nondik norakoak azalduz. Ondoren, dokumentalaren emanaldia izango eta, azkenik, galderei erantzuteko tartea zabalduko da.

Estreinaldian, Pasaiako segadan hildakoen senideak, dokumentala garatu duen lan talde teknikoa, elkarrizketatuak eta ordezkari instituzionalak izango dira. Dokumentalean, hildakoen senideek, Joseba Merino eta Rosa Jimeno gertaeren lekuko zuzenek, Pasaiako herritarrek, Santi Gonzalez eta Miguel Castells abokatuek, Carlos Garaikoetxea lehendakari ohiak, Paco Etxeberria mediku forentseak, Fernando Orgambides El Paiseko kazetaria zenak eta Enrique Villareal 'El Drogas' musikariak parte hartu dute, besteak beste. Ikerketa lana, zehaztasuna eta sakontasuna ditu oinarri, eta thiller-a eta drama uztartzen ditu; irudi gogorrak nahiz momentu intimo eta sentikorrak barnebiltzen ditu. Berria egunkariaren eta Gogora Institutuaren babesa ditu dokumentalak.

Pasa den urteko azaroan crowdfunding kanpaina abiatu zuten 40 egunetan 8.000€ lortzeko helburuarekin. Jarritako xedea lau egunetan lortu zuten. Orain, dokumentala lau haizetara zabaltzea da xedea. Estreinaldirako sarrerak eskuratzeko orduan crowdfunding kanpainan parte hartu zutenei lehentasuna eman zaie lehentasuna. Jada 200 eserleku erreserbatuta daude, eta beste 100 baino ez dira geratzen. Estreinaldirako eserleku bat erreserbatu nahi duenak, nahikoa du, izen-abizenak eta zenbat eserleku nahi dituen zehaztuz, mezu bat oinatzak.produkzioak@gmail.com helbide elektronikora idaztearekin.

Estreinaldiren ondoren, dokumentala Euskal Herriko hainbat zinema aretotan ikusteko aukera izango da. Garrantzia berezia izango dute, estreinaldiaz gain, Azpeitia eta Pasai Donibaneko emanaldiek. Lehenengo herrian, urriaren 26, 29 eta 30ean izango dira emanaldiak, Soreasu antzokian. Bigarrenean, berriz, azaroaren 11n, Juanma Berasategi aretoan.

Temas

Euskera

Fotos

Vídeos