Orioko sortzaile handiaren 109. urteurrena ospatuko du Oteiza Museoak

Jorge Oteiza, 1992ko argazkian./AYGÜES
Jorge Oteiza, 1992ko argazkian. / AYGÜES

Hainbat ekitaldi prestatu ditu astebururako, sarrera libreko bi egun eta 'Oteizak' operaren aurrerapen baten aurkezpena barne

Jorge Oteizaren (1908ko urriaren 21a–2003ko apirilaren 9a) 109. urteurrena ospatzeko, hainbat ekitaldi antolatu ditu Oteiza Museoak datorren astebururako. Hala, hilaren 21 eta 22an libre izango da sarrera, ikustaldi gidatua egingo da eta Ensemble E 7.2.-ren 'Oteizak' opera proiektuaren musika-emanaldia eskainiko ditu.

Sarrera libreko egunak urriaren 21a eta 22a izango dira, Museoaren ohiko ordutegian. Egun horietan zehar, bisitariek eskultorearen lanaren bilakaera islatzen duen 'Oteiza 1908-2008' erakusketa ikusteko aukera izango dute. Gainera, lantegi-etxean sartu ahal izango dira, eta bertan ikusgai izango dituzte bai artistari eta artistaren obrari buruzko ikus-entzunezkoak.

Larunbatean, hilak 21, eguerdiko 12:30ean, bisita gidatua egingo da, Aitziber Urtasunen eskutik. Bisitan zehar, Oteizaren obra eta pentsamendu estetikoaren gako nagusiak azalduko dira, Saenz de Oizak altxatutako Museorako arkitektura-proiektuari loturik.

Hilaren 22an, berriz, eguerdiko ordu batean, 'Oteizak' operaren performance aurkezpena hartuko du museoak. Ensemble E7.2.k garatutako proiektua da, eta umotze fasean dago une honetan. Beraz, proiektuaren aurrerapena izango da, Juan Jose Eslabak konposatutako operako musika bidezko esku-hartze batean gauzatua. Emanaldia datorren urtean opera osoaren estreinaldia hartuko duen After Cage jaialdiaren egitarauaren parte da.

Oteiza Museoko ekitaldian Ensemble E 7.2.k, oraingo honetan biola, biolin, kontrabaxu, perkusio, akordeoi eta elektronikaz osatuak, operaren II. ekitaldiko III. eszena joko du. Ondoren, proiektuaren aurkezpen artistikoa izango da, E7.2.ren kide Juanjo Eslaba eta Pablo Ramosen eskutik.

Jardunaldian zehar, Ensemble berak soinu-dispositibo bat instalatuko du, hain zuzen Jorge Oteizaren konklusio obra, hots, azken kutxa irekiak eta kutxa metafisikoak, hartzen dituen aretoan; obra horietan gorpuzten da Oteizak hutsaren inguruan eskulturazkoaren elementu aktibotzat garatu zuen ikerkuntza. Artistaren liburutegi pertsonala ere hartzen duen espazio horrek soinu-instalazio aipatua erakutsiko du; bertan, bozgorailu sorta batek loop gisa transmitituko ditu operako sekuentzia elektronikoak, soinu-maketekin batera. Instalazioa hazten joango da, eta pixkanaka elementu gehiago jasoko ditu proiektua hazi ahala, harik eta 2018an behin betiko osatzen den arte.

Temas

Euskera

Fotos

Vídeos