Nazioartera irteteko laguntza jasoko dute Landarbasok eta Josu Okiñenak

Landarbaso Abesbatza, uztailean eskainitako emanaldian./ARIZMENDI
Landarbaso Abesbatza, uztailean eskainitako emanaldian. / ARIZMENDI

Foru Aldundiak 36.000 euro bideratuko ditu guztira horretara, eta datorren urtean laguntzak sistematizatzeko asmoa duela iragarri du

Diputatu kontseiluak, Kultura sailak hala eskatuta, Landarbaso Abesbatzari eta Josu Okiñenari 18.000 euroko diru-laguntza bana esleitzea erabaki du, euren lana atzerrian erakus dezaten. Foru Aldundian aurreratu du, halaber, 2018 urtean 'gipuzkoar talentua' nazioartean erakustera bideratutako laguntza horiek sistematizatzeko asmoa duela. Hori egin bitartean, aurretiazko deialdirik gabeko laguntza zuzenak eman zaizkie Landarbasori eta Okiñenari.

Landarbaso Abesbatzaren kasuan, laguntzaren xedea da Japioniako Karuizawako Nazioarteko Abesbatzen Jaialdian izango duen parte-hartzea finantzatzea. Egunotan Japonian biran dabilen Landarbaso, hain zuzen, abesbatza gonbidatua izango da aurten izen handiko jaialdi horretan. Denis Itxaso Kultura diputatuaren hitzetan, Gipuzkoako musika koralak horrelako errekonozimendua jaso izana berri bikaina da, musikaz haragokokoa. "Kulturak, eta bereziki musikak, lehen mailako ekarpena egiten diete Gipuzkoaren nazioarteko projekzioari eta irudiari".

Landarbaso Abesbatza, Foru Aldundiak ohar baten bidez gogoratu duenez, "talde gaztea da, dinamikoa, ez profwesionala eta bere kulturarekin konprometikoa". Egunotan Japonian aurkezten ari den programak bi atal bereizten ditu: polifonia eta folklorea. Azken horretan euskal musika interpretatzen dute soilik; Xabier Sarasola, Javier Busto, Junkal Gerrero edo Iker Gonzálezen lanak, alegia. Iker González konpositore zumaiar gazteak propio sortu du pieza bat, Japonian estreinatua izan dadin, 'Mendeen ahotsak' izenekoa. Gerra Zibila dakar gogora, eta Lauxetaren eta Balendiñe Albizuren testuetan dago oinarrituta.

Josu Okiñenak jasoko dituen 18.000 euroak, berriz, Estatu mailako eta nazioarteko bira eta 'Xuxurlak' diskoaren aurkezpena finantzatzeko dira. Okiñenaren lanaren ezaugarrietako bat da euskal kultur ondarearen berreskurapena. Une honetan, Sony Classical-en eskutik, Xuxurlak izeneko proiektuan dago murgilduta. Proiektuaren xedea da argitaratu gabe dauden bildumak berreskuratzea. Diskora eraman dituen piezetatik, hain zuzen, inoiz argitaratu gabeak dira %70. Horietako bat Aita Donostiaren azken maisulana da, 1954an, hil baino bi urte lehenago, konposatutako 'Andante doloroso' lau minutuko pieza, orain dela bi urte "kasualitatez" aurkitua.

Temas

Euskera

Fotos

Vídeos