Doinu klasikoak haurrei hurbiltzeko eguna Musika Hamabostaldian

Iazko saio batean, adi-adi dituzte haurrak Saioa Aizpuruk eta Ane Artetxe arpa-jotzaileak. /Sara Santos
Iazko saio batean, adi-adi dituzte haurrak Saioa Aizpuruk eta Ane Artetxe arpa-jotzaileak. / Sara Santos

Oso sarrera gutxi gelditzen dira 'Pedro y el Lobo' ikuskizun nagusirako, baina beste aukerarik ere bada egunaz gozatzeko

Musikarekiko zaletasunak ez duenez adinik, eta ez denez sekula goizegi zaletasun hori sustatzen hasteko, Musika Hamabostaldiak urtero izan ohi du tarte bat haurrentzat. Aurtengo edizioan, astelehen honetan, abuztuak 21, ospatuko da Haurren Eguna. Arrakasta aurretik du bermatua, ia oso-osorik saldu baita Victoria Eugenia antzokia eguneko jardunaldi nagusia den 'Pedro y el Lobo' ikusi ahal izateko.

Oraingo honetan, Etcétera konpainiak moldatu du Sergei Prokofiev-en ipuin musikatu ezaguna. Sarrera aurretik erosi dutenek ikuskizun zoragarriaz gozatuko dute. Sarrerarik gabe, ordea, oso urriak dira aukera, toki gutxi batzuk baino ez direlako gelditzen (igande eguerdian egin da kontsulta), ikuspen murriztuko guneetan.

Ez da plazarik gelditzen, halaber, emanaldiaren aurretik, 17:00etan, Victoria Eugenia Antzokiko Foyer-ean, ikuskizunerako sarrera eskuratu duten haurrei zuzendutako 'Basoko Etxola' izeneko tailerrean parte hartzeko.

Musikari gazteak protagonista

Badira, ordea, musikaz gozatzeko beste aukera batzuk. Nagusia, Okendo plazan 17:00etan eskainiko den 'Musika bai!' emanaldia. Abuztuaren 16tik 30era egiten ari diren izen bereko musika-udalekuetan parte hartzen duten haur eta gazteek eskainiko dute emanaldia. Udaleku horiek 3 eta 15 urte bitarteko haur eta gazteei zuzenduta daude, eta gazte horiek musikarako duten zaletasuna piztea, bultzatzea eta lantzea da Do,re,ni-k eta Musika Hamabostaldiak elkarlanean antolatzen dituzten udaleku hauen helburu nagusia. Udalekuetan egiten dituzten jardueren artean dago, hain justu, Okendo Plazan eskainiko duten ikuskizuna. Aurten gainera, Xabier Lizaso musikari eta ikertzaileak zuzentzen duen Do, re, ni egitasmoak gizarteratzearen aldeko apustua egin du, eta hori horrela, lehen aldiz hartu du bere musika udalekuetan 14 eta 17 urte bitarteko Atzegiko nerabe talde bat.

Haurrei zuzendutako jarduerek Hamabostaldian zehar izango dute jarraipena 'Kantu Kontari' egitasmoaren eskutik. 'Kantu Kontari' formatu txikiko ikuskizun bat da, non ipuin kontalari bat eta musika uztartzen diren. 2 eta 8 urte arteko neska-mutilei zuzendutako ekimen honek, musika eta ipuinak bitarteko direla, entzuteko gaitasuna garatzea du helburu nagusi. Aurten gainera, Donostiatik harago, Gipuzkoako hainbat herritara ere heldu da ipuin musikalen esperientzia. Zumaia eta Getaria bisitatu ostean, abuztuaren 24an Mutrikuko Zabiel plazak izango dira 18:00etan; abuztuaren 25ean Irunen, eguerdian, eta azkenik abuztuaren 26an Donostian, Kursaaleko Kursaaleko Foyer-ean, 11:30ean. Donostiako ikuskizunak 3 euroko prezioa du, eta sarrerak hemen eros daitezke.

Temas

Euskera

Fotos

Vídeos