Udaberri arabiarren ostean, negu gorria etorri da

Mikel Ayestaran, Ane Irazabal eta Karlos Zurutuza./ARIZMENDI
Mikel Ayestaran, Ane Irazabal eta Karlos Zurutuza. / ARIZMENDI

Mikel Ayestaran, Ane Irazabal eta Karlos Zurutuzaren kronika eta gogoetak dakartza 'Ekialde Hurbila. Muinak eta ertzak' liburuak

FELIX IBARGUTXI

Mikel Ayestaran, Ane Irazabal eta Karlos Zurutuza, gatazka-tokietan jardundako hiru kazetarion artikuluekin 'Ekialde Hurbila. Muinak eta ertzak' liburua plazaratu da Berria, Elkar eta Jakin-en 'Aleka' bildumaren barruan. Udaberri arabiarren ondorengo egoera aztertzen dute haietan eta, atzo egin zen aurkezpena eta hirurak bat etorri ziren: "Etsipena, horixe da herrialde haietako herritarrek sentitzen dutena".

Mikel Ayestaranen lehenengo artikulua Irani buruzkoa da. "Bai, Iran hartu dut abiapuntu, lehenengo iraultza ez baitzen arabiarra izan, pertsiarra baizik", esan zuen atzokoan. Liburuan honela azaltzen du: "2009ko ekainean, presidentetzarako hauteskundeak antolatu zituzten irandarrek, eta iraultza islamikoa ezarri zenetik –1979tik– inoiz ikusi gabeko protestak lehertu ziren. Mahmud Ahmadinejad ultrakontserbadoreak beste lau urtez izan nahi zuen presidente, baina aurrean aurkari handia zuen, erreformisten burua zena: Mir Hussein Musavi. Hogei urtez politikaren lehen lerrotik urrunduta egon ondoren, 80ko hamarkadan Iraken aurkako gerra garaian lehen ministro izandakoa itzuli egin zen, eta haren jarraitzaileek Mugimendu Berdea antolatu zuten, aldaketak eta irekiera aldarrikatzeko".

Estatu Islamikoaz honela mintzatu zen atzo Ayestaran: "Kalifa herria amaitu da. Militarki garaituta daude, baina honek ez du esan nahi Estatu Islamikoa amaitu denik. Hau historia amaigabea da, eta ez dakigu zer etorriko den". Eta Palestinari buruz, berriz: "Okupazioak etengabe egin du aurrera. Orain Trump dago, baina Barack Obama zegoenean ere aurrera egin zuen okupazioak".

«Orain Trump dago, baina Obamaren garaian ere aurrera egin zuen Palestinako okupazioak» MIKEL AYESTARAN

«Tunisian zeharo txundituta daude. Gazteek etorkizunik eza sentitzen dute» ANE IRABAZAL

«Sahararrena kasu mingarriena da.Hori bai izan dela gatazka usteltzea» KARLOS ZURUTUZA

Eugenio García Gascón maisutzat du Ayestaranek, eta harekin bat omen dator: "Palestinan dago Ekialde Hurbileko arazoaren zero gunea. Hango gatazka konpondu arte zaila izango da besteak konpontzea. Bitartean, Israel gero eta indartsuago dago".

Ane Irazabalek Tunisiaz eta Egiptoz idatzi du. "Egipton bi urtez bizi izan nintzen, 2011tik 2013ra, eta Tunisiara bidaia asko egiten nuen. Egipto da kontrairaultzaren adibiderik garbiena. Kazetari batek esan zidan ez zela nahikoa Mubarak botatzea. 'Egin genuen okerrik handiena izan zen Mubarak erori ostean etxera bueltatzea. Aparatu guztia erori arte protestaka jarraitu behar genuen'. Baina zer gertatu zen? Estatuko indar sakonak berriz batu ziren 2013ko kolpea jotzeko".

Irazabalek oso egoera tristea ikusten du Egipton: "Herritarrek jipoia jaso dute ekonomikoki ere. Izugarri kostatzen ari zaie bizirautea". Tunisiari ere kezkaz begiratzen dio Irazabalek: "Hango esperimentu politikoa oso ahula da. Herritarrak zeharo txundituta daude emozionalki. Gazteek etorkizunik eza sentitzen dute".

Karlos Zurutuzak, berriz, aitorpenik gabeko herri batzuen gaineko artikuluak ekarri ditu liburura: Libiako amazigak, kurduak eta sahararrak. "Mapetan agertzen ez diren herrietan ibili naiz ni asko, radarretatik kanpo dauden gatazkak jorratzeko joera izan dut", esan zuen atzoko aurkezpenean.

"2001ren aurretik ohiko destinoak Afganistan eta Irak ziren. Gero fokoa Libiara pasa zen. Paraxutistak bezala azaldu ginen kazetari denok, aurretik prestatu gabe, eta gaizki sentitu nintzen", jarraitu zuen. "Ahaztuta gelditu zen Libia, baina nik jarraitu dut hara joaten eta ikusten dut urtetik urtera okerrera egin duela. Libiarrek esaten dute lehen hobeto bizi zirela, dirua bazeukatela, nahiz askatasunik ez zegoen". Baina kasurik larriena Saharakoa da Zurutuzaren ustetan: "Hori da kasu mingarriena. Hori bai izan dela gatazka usteltzea".

Mikel Ayestaranek (Beasain, 1975) Vocento eta Eitb-rako egin izan du lan bereziki. Sari asko izan ditu, hala nola Nazioarteko Klubarena eta Euskal Kazetariak saria. Ane Irazabalek ere (Arrasate, 1984) Euskalkazetariak saria jaso berri du. Karlos Zurutuza (Donostia, 1971) Rikardo Arregi eta Argia sariak irabaziak ditu, bere kronikak direla eta. Irazabal eta Zurutuzak euskarazko kronika asko publikatu dituzte Berria eta Argian.

Temas

Euskera

Contenido Patrocinado

Fotos

Vídeos