Bi baxenabartar Mendaurren hilda, azteken erritu bati jarraituta

Ladron Arana, hamargarrena duen liburuaren aurkezpenean./F.I.
Ladron Arana, hamargarrena duen liburuaren aurkezpenean. / F.I.

Alberto Ladron Aranak 'Jainkoen zigorra' nobela publikatu du, Leire Asiain inspektorearen hirugarren kasua

FELIX IBARGUTXI

Alberto Ladron Aranak (Iruñea, 1967) bere hamargarren eleberria plazaratu du, 'Jainkoen zigorra', aurrekoak bezala misteriozko nobela beltza. Nafarroan dago kokatua: Mendaurko mendi-tontorrean Olivier eta Peio Idiart, bi anaia baxenabartarren hilotzak agertu dira eta Foruzaingoko Leire Asiain inspektorea arduratuko da ikerketa-lanaz. Inspektore honen hirugarren nobela dugu; aurrekoak 'Harrian mezua' eta iazko 'Gezurren basoa' izan ziren.

Elkar argitaletxeko Xabier Mendiguren editoreak azaldu duenez, «gaur egun idazle hau da nobela beltzari lotuen dagoena, bai titulu kopuruz bai jarraikortasun aldetik. Eta, gainera, arrakastaz, nahiz berak ez du bere buruaren marketinik egiten, nahiz ez den Durangoko Azokara azaltzen liburuak sinatzera, adibidez».

Mendaurko ermitaren ondoan agertzen diren bi lagun horiek erritu azteka bati jarraituz izan dira sakrifikatuak, itxura batean. Foruzaingoak hartuko du kasuaren ardura, jendarmeriarekin elkarlanean. Laster ohartuko dira krimen honen atzean gauza handiren bat dagoela, ahal handiak dituen norbait.

Aurreko kasuetan bezala, Leire Asiain krisi pertsonal larri baten erdian dago. Lantokia halako irla bat da, hura nahiko ongi kontrolatzen du, eta beti saiatuko da lana taxuz egiten, baina bizitza pribatuan arazo latzak ditu; besteak beste, jendearekin erlazionatzeko zailtasun handiak. Emakume honen kontrapuntua Txueka inspektoreordea da, gizon umoretsua.

«Irakurlea lehenengo atalean harrapatzen saiatzen naiz, eta bukaeraraino kateatuta eramaten», adierazi du idazleak. «Badakit irakurleak bere teoria eta hipotesiak egingo dituela, eta nik egin behar izaten dut espektatiba horiek gainditu».

Ladron Aranak ohitura duen bezala, erritmo biziko nobela da. Deskripzioak oso-oso laburrak dira eta pertsonaien arteko elkarrizketen bidez transmititzen du informazioa. «Aurreko liburuaren aldean, oraingoan anbiziotsuago jokatu dut. Eta Leire Asiainen munduan gehiago sakondu dut».

Idazlea oso mendizalea da eta sarri egon da Mendaurreko tontorrean. «Indar handiko tokia da. Gure geografia aprobetxatu behar dugu istorioak asmatzean».

Temas

Euskera

Fotos

Vídeos