Diario Vasco

«Askotan esan didate...»

  • Hona Arantxa Urretabizkaiaren 'Bidean ikasia' liburuko ataletako bat

«Askotan esan didate, Gaintxurizketa baino haratago, ez dutela ulertzen zer gertatzen den Hondarribian Alardearen inguruan, ez zaiela buruan sartzen. Gehiagotan esan dio hondarribiar batek bertako ez den norbaiti alferrikakoak direla arazoa ulertzeko ahaleginak, hori bertakoek bakarrik uler dezaketela, are gehiago, Alarde baztertzailearen aldeko ez diren bertakoek ere ez dutela ulertzen. Sentikizunak daudela jokoan, sentikizun sakonak, XVII. mendetik XXI. mendera heldu direnak.

Zuk izan dezakezu iritzi arrazoitua Hego Afrikako apartheidari buruz, egon zintezke hango zuri eta beltzen arteko eskubide berdintasunaren alde, izan dezakezu funtsezko iritzi bat Siriako gerraren inguruan, Meditarreneoan hiltzen diren etorkinei buruz edo koka dezakezu zeure burua Afrikan ablazioa pairatzen duten emakumeen alde. Horretarako ez duzu bertakoa izan behar, aski duzu informazioa, hausnarketa eta ideologia pittin bat.

Hondarribikoa ulertzeko, berriz, sanedrinaren kide izan behar omen duzu, edo gutxienez haien jarraitzaile itsua, sekretua apaiz nagusi gutxi batzuen esku balego bezala.

Gure gatazka honetan gertatzen dena ulertu nahi duenak zabaldu egin behar du begirada. Izan behar du gogoan zeinen erraz bilakatzen dugun arerioa etsai, desberdin pentsatzen duena gizakalte. Aise aurkitzen dugu jokaera hori bazter askotan. Bi traineru dituen herrian, bi ikastola dituen udalerrian edo zaborrarekin egin behar denari buruz iritzi desberdinak dituztenen artean.

Desadostasun bat sortzen denean, gure arteko joerarik zabalduena jarrera bakoitza muturreraino eramatea da, muturraren muturrera. Egitekotan, handik egiten da adostasuna bilatzeko ahalegina. Eta, bitartean, barneraruta dugu burmuinaren azken tolesduraraino, biolentzia pittin bat, irain batzuk, agur ukatze batzuk, bultzaldi batzuk, onuragarri direla norberaren jarrerak aurrera egin dezan. Hamaika horrelako ikusi ditut nik, Gaintxurizketa pasa bezain laster bakezale amorratu bilakatzen direnak.

Hondarribikoak berezitasun bakarra du eta ez da gatazkaren aitzakia, luzapena baizik. Horretan bai garela bereziak.

Zergatik? Funtsean, arrazoi politikoak direla medio, erakunde politikoek ez dutelako nahikoa egin konponbidearen alde, eragin gehien duen erakundeak hasieratik egin zuelako alderdi baten aldeko apustua, ez adostasunaren edo konponbidearen aldekoa».

'Bidean ikasia'. Arantxa Urretabizkaia. Pamiela argitaletxea, Kondagintza saila. 127-128 orrialdeak.

Temas

Recibe nuestras newsletters en tu email

Apúntate