Diario Vasco

Fernando Aranburu donostiarrak 'Patria' eleberria aurkeztuko du

Artxiboko argazkia. Fernando Aranburu, Bilbon.
Artxiboko argazkia. Fernando Aranburu, Bilbon. / M. LÓPEZ
  • Bilboko Bidebarrieta Kulturgunean izango da asteazken honetan, irailak 14, arratsaldeko 19:30ean

Fernando Aranburu idazle donostiarrak 'Patria' izenburuko bere azken eleberria aurkeztuko du Bilboko Bidebarrieta Kulturgunean asteazken hontean, irailak 14, arratsaldeko 19:30ean. Tusquets argitaletxeak kaleraturiko lanak «ETAren indarkeriaren ondorioz apurtuta eta elkarren kontra dagoen herri baten hiru hamarkada kontatzen ditu». Ekitaldia Cesar Coca kazetariak aurkeztuko du, eta streaming bidez eskainiko da, Bilboko Udalak jakinarazi duenez.

Ia 700 orrialdetan, 'Patria' lanak Donostiatik gertu dagoen herri batean bizi diren bi familiaren historia kontatzen du. Hasieran adiskidetasun estuak elkartutako familiak dira, baina denbora asko igaro aurretik etsai bihurtuko dira arrazoi politikoengatik, eta narrazioaren ardatz nagusiak diren amek bultzatutako elkarrenganako gero eta gorroto handiagoaren biktima izango dira. Ekintzak hiru hamarkada baino gehiago hartzen ditu, 1980ko hamarkadaren erdialdetik, ETAk indarkeria behin betiko utziko zuela iragarri eta hilabete batzuetara arte.

Etsai diren arren, bi familietako seme-alabetako batzuek harremanetan jarraitzen dute ezkutuan. Lehenbiziko familiak gora egingo du ekonomiaren ikuspuntutik, garraio enpresa bat duen aitaren ekintzailetzarako gaitasunari esker. Bere eta senideen bizimodua goitik behera aldatuko da ETAren estortsioaren biktima bilakatzen denean. Geroago hil egingo dute, eta gertakari horrek hainbat modutara izango du eragina bi familietako kide bakoitzarengan. Bigarren familiako semeetako bat ETAn sartuko da, hainbat atentatutan hartuko du parte eta kartzelan amaituko du.

Fernando Aranburu (Donostia, 1959) Filologia Hispanikoan lizentziatua da Zaragozako Unibertsitatean, eta 1985etik Alemanian bizi da. Hiru kontakizun liburuki eta 'Fuegos con limón', 'Los ojos vacíos', 'El trompetista del Utopía', 'Bami sin sombra', 'Viaje con Clara por Alemania', 'Años lentos', 'La Gran Marivián', 'Ávidas pretensiones' eta 'Las letras entornadas' eleberriak idatzi ditu. Beste sari batzuren artean, Euskadi saria, Mario Vargas Llosa saria, Real Academia Española saria, Tusquets Editores Eleberri saria eta Biblioteca Breve saria irabazi ditu.

Temas