Kalakanek Bach eta Vivaldi sartu ditu bere errepertorioan

Kalakan taldeko kideak, disko berria eskutan hartuta/Sara Santos
Kalakan taldeko kideak, disko berria eskutan hartuta / Sara Santos

Duo L’Incontro-rekin elkarlanean, musika klasikoaz gain, euskal musika tradizionalaren oihartzunak ere entzun daitezke Ipar Euskal Herriko taldearen disko berrian

AMALIA IBARGUTXIDonostia

Kalakan taldeak beste disko bat plazaratu du: ‘Lamin’. Horretarako, Duo L’Incontro-rekin elkartu da eta musika barrokoa da bertako protagonista nagusia, izan ere bikote hori osatzen duten bi emakumeek (Francesca Romana di Nicola harpa-jotzaileak eta Itziar Lujanbio oboe-jotzaileak) arlo hori landu izan baitute. Biak ala biak Musikenetik pasatakoak dira.

Autoprodukzioaren bidez egindako diskoa da eta ez da ohiko salmenta-guneetan egongo. Kalakanen webgunean eta beronen kontzertuetan eskuratu ahal izango da soilik.

"Zubia egin dugu. Gure xedea izan da inkurtsioa egitea barrokoan", adierazi du Xan Errotabeherek. Honekin batera, Jamixel Bereauk eta Pierre Sanglak osatzen dute Kalakan. Uda partean zenbait kontzertu eman zituzten bost lagunok, batez ere Ipar Euskal Herriko elizetan, eta orain lankidetza horrek disko itxura hartu du.

Diskoan Bach eta Vivaldi ageri dira, baina euskal musika tradizionalaren oihartzunak ere entzun daitezke, hauxe baita Kalakanen arlo naturala. "Disko suabea da (esan du Errotabeherek). Gu hurbildu egin gara Itziar eta Francescaren doinuetara".

Abenduaren 14an, ostegunean, Hendaian joko dute eta hurrengo egunean Donapaleun.

Temas

Euskera

Contenido Patrocinado

Fotos

Vídeos