Irudika, ilustratzaileen topagune profesionala

Artium Museoan egin dute aurkezpena astelehen honetan./IREKIA
Artium Museoan egin dute aurkezpena astelehen honetan. / IREKIA

Euskadiko I. Ilustrazio Topaketa Profesionala Gasteizen egingo da ostiralean eta larunbatean

Euskal Irudigileak elkarteak Irudika Euskadiko Ilustrazio Topaketa Profesionalaren lehenengo edizioa egingo du ostiralean eta larunbatean, azaroaren 10ean eta 11n, Gasteizko Artium Museoan, Euskadiko irudigintza sektorea eta industria nazioartean ikusgai jartzeko "erakusleiho aparta" izateko asmoarekin. Euskal Irudigileak elkartearekin batera, Eusko Jaurlaritzak, Arabako Foru Aldundiak, Gasteizko Udalak eta Artium Museoak antolatu dute ekimena.

Topaketaren aurkezpena Artium Museoan bertan izan da, eta Elisabeth Perez Euskal Irudigileak elkarteko lehendakariak, Joxean Muñoz Jaurlaritzako Kultura sailburuordeak, Igone Martinez de Luna Arabako Foru Aldundiko Euskara, Kultura eta Kirol diputatuak eta Nerea Malgosa Gasteizko Udaleko Enplegu eta Garapen Ekonomikoko zinegotziak parte hartu dute.

Herri erakundeetako ordezkariek Irudika ekimenaren garrantzia nabarmendu dute, eta Elisabeth Perezek azpimarratu du "Gasteiz berriz ere erreferentzia" izango dela irudigintzaren munduan.

Irudika "nazioarteko azoka izateko bokazioarekin" aurkeztu da lehenengo edizio honetan. Ekitaldiaren helburua da profesionalei etengabeko prestakuntza espezializatua eskaintzea bertako zein nazioarteko hizlarien hitzaldien eta tailerren bidez. Horrela, edizioaren, irudigintzaren, komikigintzaren eta animazioaren munduan erreferentzia diren pertsona ezagunak elkartuko dira topaketaren bi egunetan, eztabaida eta gogoeta egiteko eta lanak erakusteko.

Euskadiko I. Ilustrazio Topaketak lau ekintza lerro ditu. Alde batetik, eztabaida eta mahai inguruak izango dira. Elkarrekin argitaratutako lan bat duten hiru hizlariren hiru txanda izango dira, eta txanda bakoitzean beti izango da euskal profesional bat, argitaratzaile bat eta irudigile bat gutxienez. Hirurek hitz egingo dute lotzen dituen proiektuaz, eta, bakoitzak bere lanbidearen ikuspegitik, "360 gradutan osatuko dute argitalpen lanaren esperientzia".

Tailer 'sekretuak'

Beste alde batetik, Irudikak bost "tailer sekretu" eskainiko ditu. Horrela, topaketak nazioarteko hizlarien parte hartzea aprobetxatuko du, "ikaskuntza teorikoen, hitzaldien, eztabaiden eta solasaldien bidez ez ezik, batez ere praktikaren bidez ere egiten baita bizipenen benetako elkartrukea".

Hirugarren ekintza lerroa hitzordu eta elkarrizketa profesionalak izango dira (networking). Irudigileek argitaratzaileekin eta profesionalekin elkartzeko aukera izango dute euren paper-zorroa hobetu ahal izateko eta lan hitzarmenak burutu ahal izateko. Irudigintzatik elikatzen diren sektoreetako, hau da, publizitate eta agentzietako, animazio produktoretako, aldizkari eta prentsako, argitaletxe eta diseinu grafikorako estudioetako edo arte grafikoekin zerikusia duten enpresetako profesionalen arteko networking eremua egokituko da.

Azkenik, sorkuntzari laguntzeko eta etorkizunera begira, irudigintzaren eta animazioaren arloko bi lehiaketa sortzeko plataforma ere izango da Irudika, eta irabazleek saritzat eramango dituzte 1.000 euro eta egoitza artistiko bat Gasteiz, Bilbao Arte eta Algulemako La Maison des Auteurs artean. Sari honek Adoberen laguntza du.

Temas

Euskera

Fotos

Vídeos