Hirugarren finalaurrekoa, Maule-Lextarren

Beñat Gaztelumendi 2013ko finalean. Orduko finalista gisa iritsi da Mauleko saiora./ARIZMENDI
Beñat Gaztelumendi 2013ko finalean. Orduko finalista gisa iritsi da Mauleko saiora. / ARIZMENDI

Bizkaiko, Nafarroako eta Gipuzkoako txapeldunak, Etxahun Lekue, Julio Soto eta Beñat Gaztelumendi, igoko dira oholtzara Beñat Iguaran, Nerea Elustondo eta Nerea Ibarzabalekin batera

Bi saio baino ez dira falta BECen libre dauden zazpi postuak norentzat izango diren erabakiko duen finalaurrekoen bigarren itzulirako: larunbat arratsalde honetan Maule-Lextarren jokatuko dena, eta azaroaren 12an Durangoko Landakon izango dena. Fase honetan puntuek garrantzi handia dutenez (lehen itzulian puntu gutxien lortu duten sei bertsolariek bigarrenean kantatzeko aukera galdu egingo dute), aurretik ibili direnek zer egin duten jakiteak areagotu egingo du agian berez nahiko handia den presioa. Puntu horretan iritsiko da beraz Txapelketa Nagusia bigarren aldiz Ipar Euskal Herrira, Baigorrin hasi eta Zuberoan egingo baitu hurrengo urratsa, larunbat honetan, azaroak 4, 17:00etik aurrera Ororena jai alain. Sarrerak amaitu ezean, 15:00etan zabalduko da lehiatila.

Oholtzara igoko diren sei bertsolarien artean, bakarra dator zuzenean 2013ko finaletik: 2015ean Gipuzkoako Txapeldun izandako Beñat Gaztelumendi. Final laurdenetan Tolosako saioa irabazi eta zuzenean sailkatua da, berriz, Etxahun Lekue, iaz Bizkaiko Txapelketa irabazitakoa. Iragan apirilean Nafarroako txapela laugarren aldiz jantzi zuen Julio Soto ere han izango da, eta seikoa osatuko dute Zumaiako final laurdena irabazita zuzeneko pasea lortu zuen Nerea Ibarzabalek, Beñat Iguaranek eta Nerea Elustondok. Aurkezle Saroi Jauregi ariko da.

Maule-Lextarreko saioan irabazten duen bertsolaria zuzenean sailkatuko da Txapelketa Nagusiko bigarren itzulira, hain zuzen azaroaren 19an Amurrion jokatuko den saiora.

Bertaratzea ez dutenek, zuzenean jarraitu ahal izango dute saioa ETB4n Aitzol Barandiaran eta Uxue Alberdiren eskutik, eta www.bertsoa.eus atarian ere ikus eta entzun ahal izango saioa zuzenean.

Temas

Euskera

Fotos

Vídeos