Hiru gau Sarako Lezean Kalakan eta lagunekin

Ezkerretik eskuinera, Xan Errotabehere, Pierre Sangla eta Jamixel Bereau. / Kalakan.eus

Astelehenetik asteazkenera, hiru emanaldi eskainiko dituzte toki bitxi horretan, musika mota desberdinak landuz eta musikari ezagunez inguratuta

Ainhoa eta Urdazubidekin batera Xareta lurraldea osatzen duten Zugarramurdi eta Sara, besteak beste, izarea oso bereziko leize-zukoak izateak senidetzen ditu. Nafarroako herrian zein Lapurdi barrualdekoan, kondaira zaharrak darizkie koba-zuloetako hormei. Izaki mitologiak, sorginak, kontrabandistak... Askotariko biztanle eta bisitariak izan dituzte historia luzean zehar, asmatuak edo egiazkoak.

Azken urteetan erakargarri turistiko bilakatu dira, eta agertoki handi ere bai, Zugarramurdiko zein Sarako leize-zuloetako giro magikoa oso aproposa baita, udako gau epeletan batik bat, sortzaileen lanaz gozatzeko.

2016ko amaieran taldea utzi zuen Thierry Biscaryren ordez hirukotera bilduteko Pierre Sanglak, Jamixel Bereauk eta Xan Errotabeherek osatzen duten Kalakan hirukoteak Sarako leize nagusia, Lezea izenekoa, aukeratu zuen hainbat lagunekin batera zenbait kontzertu eskaintzeko. Esperientzia ederra izan zenez denentzat, errepikatzea erabaki zuten, eta aurten ere hiru egunez ariko dira Sarako Lezean, abuztuaren 21etik 23ra, hiru musika mota desberdin landuz eta lagun ugariz inguratuta. Kontzertu guztiak 21:30ean hasiko dira eta sarrerak hemen eros daitezke.

Aurreneko kontzertua astelehen honetan eskainiko dute, abuztuaren 21ean. Euskal kantei eskainia izango da eta, horrenbestez, oholtzara igoko dira "Kalakan bezala tradizioa estetika modernoz eskaintzeko arduratuta dauden hainbat artista": Mattin Lerissa, Berçaits anaiak eta Etchegoyen ahizpak, hain zuzen.

Bigarren saioan, asteartean, abuztuaren 22an, aurten hirukotearekin maiz aritu izan den Luis Peixoto portugaldar multinstrumentista izango dute alboan, eta haren bakarkako musika eta hark Da Terra proiektuan Kalakanekin batera ondutako doinuak entzun ahalko dira.

Azkenik, abuztuaren 23ko kontzertuan, asteazkenean, jazzari egingo diote tokia. Iñaki Salvador pianistarekin batera joko du Kalakanek, eta jazzeko estandarrak zein Mikel Laboaren eta Kalakanen kantuak entzun ahalko dira.

Temas

Euskera

Fotos

Vídeos