Hamabi ordu Txomin Agirreren 'Kresala' eleberrian murgilduta

Iaz Itxaro Bordaren '%100 basque' irakurri zen. Argazkian, Borda bera./
Iaz Itxaro Bordaren '%100 basque' irakurri zen. Argazkian, Borda bera.

Bizkaieraz idatzitako eleberri kostunbrista aukeratu du Bilbo Zaharra Euskaltegiak ostegunean egingo den Klasikoen Irakurraldi Jarraituaren hamaikagarren ediziorako

«Klasikoa delako, bizkaieraz dagoelako, eleberri kostunbristaren ezaugarriak dituelako, erlijiotasun transzendente bat garatzen duelako, naturaz gaindiko indarren apologia egiten duelako eta irakurtzeko irrika sortzen duelako». Arrazoi horiengatik aukeratu du Bilbo Zaharra euskaltegiak Txomin Agirreren 'Kresala' eleberria 'Klasikoen Irakurraldi Jarraitua'-ren hamaikagarren ediziorako.

Ikasturtearen amaiera dela eta ospatzen duten Euskara Ikasleen Jaiaren barruan kokatzen den ekimena Arriaga Antzokian gauzatuko da ostegun honetan, ekainak 7, goizeko 08:00etatik arratsaldeko 20:00etara. Bertatik bertara ez ezik, EITB-ren webgunean zein Arriaga Antzokiak kanpoaldean eta Azkuna Zentroak Kulturen Atarian jarriko dituzten pantailetan jarraitu ahal izango da maratoia.

'Kresala' aukeratuz, «bizkaieraren garrantzia» azpimarratzeaz gain «Euskaltzaindiaren eta euskara batuaren urteurrenak ospatu» nahi izan dituzte euskaltegiko irakasle eta ikasleek. Bilboko Udaleko Euskara eta Hezkuntza Sailak, Bizkaiko Foru Aldundiak eta Laboral Kutxak babesten dute ekitaldi nagusia. Horren amaierak, ordea, ez du ekarriko egunaren bikaera. Klasikoen irakurraldiari jai giroko bukaera eskaini nahian, musika eta dantza emanaldia izango da Arriaga Antzokiaren parean, Bilboko Gaztedi dantzari taldearen gidaritzapean. Jai honekin euskarazko ikasle guzti-guztiei omenalditxo bat egin nahi zaie baita klasikoak ezagutarazi ere. Horretarako, Bilbo Zaharra Euskaltegiak prestatu ditu Kresalaren inguruko unitate didaktiko batzuk, ikastetxe, ikastola, euskaltegi eta abarretan erabiltzeko eta lantzeko.

Lehen lerroak, Uribek

Irakurraldia goizeko 08:00etan hasi eta arratsaldeko 20:00etan bukatuko da, eta egunean zehar 400 bat lagun txandatuko dira.Kirmen Uribek irakurriko ditu liburuko lehenengo lerroak, irakurraldiari hasiera ematen. Ohikoa denez, euskal gizartearen arlo guztietako ordezkariek irakurriko dituzte liburuaren pasarteak jendaurrean. Hauexek izango dira partaideetako batzuk: Juan Mari Aburto Bilboko Alkatea, Bilboko Udaleko ordezkariak, Bizkaiko Foru Aldundiko eta Eusko Jaurlaritzako ordezkariak, Laboral Kutxako arduradunak, Andres UrrutiaEuskaltzainburua, Euskal Herriko Unibertsitateko eta Deustuko Unibertsitateko errektoreak eta irakasleak, komunikabideetako eta sindikatuetako ordezkariak; Bilbo Zaharra Euskaltegiko eta Bilboko ikastetxeetako ikasle eta irakasleak, kultur eragileak, ostalariak, Gotzaingoaren ordezkariak eta ekonomista, abokatu eta ingeniarien eskola profesionaletako ordezkariak eta abar. Tarteka, munduan zeharreko Euskal Etxeetan grabatutako irakurketa-bideoak proiektatuko dira.

Aurreko urteetan, Axularren 'Gero', Mogelen 'Peru Abarca', Jon Miranderen 'Haur besoetakoa', Saizarbitoriaren 'Hamaika pauso', Arantxa Urretabizkaiaren 'Zergatik panpox', Bernardo Atxagaren 'Obabakoak', Gabriel Arestiren 'Harri eta herri', Sarrionandiaren 'Narrazio Guztiak', Franz Kafkaren 'Metamorfosia' eta iaz Itxaro Bordaren '%100 Basque' irakurri izan dira Arriagan.

Urtero bezala, Bilbo Zaharra Forumek Arriagan irakurriko den eleberriaren inguruko hitzaldi-sorta antolatu du. Lehenengoa otsailean egin zen, Euskaltzaindiaren egoitzako aretoan.

Ostegunera bitartean, egunero dago saioren bat. Astelehenean, ekainak 4, Itxaro Borda aritu zen, 'Atzoko eta gaurko kresalak' hitzaldiarekin. Astearte honetan, ekainak 5, bi idazle gipuzkoar izango dira hizlari: Koldo Izagirre ('Arranondotik Trintxerpera Galizian barrena') eta Harkaitz Cano ('Kresalaren haritik, gaurkotasun apunteak'). Asteazkenean, ekainaren 6an, Kirmen Uribek eskainiko du azkeneko hitzaldia, horren izenburua 'Haurtzarominak Agirreri' delarik.

Temas

Euskera

Contenido Patrocinado

Fotos

Vídeos