«Txikitasunean bat egin dugu Finlandia eta Euskal Herriak»

«Finlandia Euskal Herrian ezagutzera ematea» da Suomitar elkartearen helburu nagusia, eta Donostiako Loiolako kultur etxean erakusketa antolatu dute horretarako

AMALIA IBARGUTXI

Boteprontoan askok ez dute ikusiko Finlandia eta Euskal Herria lotzen dituen haririk. Hutsune hori betetzeko, bi herrialdeen arteko lotura estutzeko, edo ezagutzera emateko behintzat, Donostiako Loiolako kultur etxean erakusketa antolatu du Suomitar elkarteak, Finlandiak independentzia aldarrikatu zuenetik 100 urte igaro direla ere ospatzeko aprobetxatuz. «Orain ala inoiz ez, pentsatu genuen».

Xila Pihlström-ek, elkarteko lehendakariak, azaltzen duenez, «Finlandia Euskal Herrian ezagutzera ematea» da Suomitar elkartearen helburu nagusia. Elkartearen sorreran, ordea, asmo zehatzago bat egon zen. Euskara-suomiera hiztegiaren sorrera, hain zuzen.

«2000 urtearen inguruan, Finlandian ezaguna den 'Gabon txikia' festa antolatu genuen hemen bizi ginen hainbat finlandiarrek. Hortik hiztegia egiteko ideia sortu zen, eta horretarako, elkarte baten beharra sumatu genuen».

Kulturen arteko harremana sendotzeko hiztegiak «balio sinboliko» handia duela defenditzen dute, «bi hizkuntza ez indoeuropar baitira, Europako bi txoko desberdinetan». Hala dela baieztatzen duen datu bezala kontuan hartu daiteke, beharbada, liburuxka hauen salmenta. Hasieran, asmoa 50 aleko edizioa egitea izan zuten, 2012an. Azkenean, baina, 500 aleko edizioa izan zen, kalkuluak gaizki egin zituzten seinale. Bigarren edizioa, eguneratua, beste 300 alek osatu zuen.

Joseba Ossa itzultzailea da, Suomitar elkarteko kide euskaldunetako bat. Azaltzen duenez, bi hizkuntzen arteko antzekotasun handiena gramatikala da.

«Biak hizkuntza aglutinanteak dira, preposizioen ordez, hitzen amaieran txertatuz informazioa, hauek asko luzatzen direlarik. Badaude esanahi desberdina duten, baina berdin idazten diren hitzak. Katu, finlandian, kale da. Talo, aldiz, etxe. Fonetikoki antzekotasun handia dago bi hizkuntzen artean».

Gainera, uste dutenez, «txikitasunean bat egin dugu Finlandia eta Euskal Herriak. Hizkuntzen antzekotasunak baino pisu handiagoa du biak ala biak hizkuntza indoeuroparrak ez izateak».

Pilar Palacios eta Xabier Belokiren 'Bidaia bat, bi ikuspegi' argazkien erakustaldiaren gainean, finlandiar hizkuntza eta kulturari buruzko argibide-taulak eta edotariko objektuak ere ikusteko aukera izango dute bisitariek urtarrilaren 29a bitartean.

Temas

Euskera

Contenido Patrocinado

Fotos

Vídeos