Andoaingo eta Eibarko bi ikastetxetako ikasleen lanak, Guggenheim museoan

Ikasle eibartarrak, euren lanarekin./
Ikasle eibartarrak, euren lanarekin.

21 urte bete ditu Artea Ikasbide ekimenak. Horretan parte hartu duten haurren lanak biltzen dituen erakusketa irailaren 16ra izango da ikusgai Bilbon

EAEko sei ikastetxetako 140 ikasleren lanak ikusi ahal izango dira hurrengo asteetan Guggenheim Bilbao museoan; 21. ediziora iritsi den Artea ikasbide egitasmoan parte hartu duten ikasleen lanak, alegia.

Museoak Erakusketa Eusko Jaurlaritzaren Hezkuntza Sailaren lankidetzarekin eta BBKren babesarekin antolatzen duen ekimenera bildu diren ikastetxe horietatik bi Gipuzkoakoak dira: Andoiango Ondarreta eta Eibarko Amaña.

Asteartean, ekainak 12, zabaldu eta irailareb 16an itxiko den erakusketaren aurkezpenean gogoratu dutenez, ikasturte honetan ekosistema landu dute. «Margotu dugu eskuekin, arrabolekin, pintzelekin edota brotxekin eta, gainera, sortu ditugu collageak, txantiloiak, azal-hegalak, pixelak; eta erabili ditugu egunkariak, argazkiak, publizitatea, plastikoa, egurra eta paper tirak. Jarduera hau 10.000 bider egitea gustatuko litzaidake», adierazu du parte-hartzaileetako batek.

Izan ere, Museoko Hezkunga-guneko arduradunek, sei eskoletako irakasleekin elkarlanean, hainbat sormen-proposamen egin zizkieten ikasleei: argazkietan jasotako talde-performance dibertigarriak; txantiloi edo erreserbekin egindako pintura esperimentalak; 17 azal-kolore desberdinekin osatutako kolore-lagina edo istorio oso berezia duen robot erraldoi bat....

Programa honen helburua da «haurrek deskubritzea, esperimentatzea, ikusten dutena zalantzan jartzea, muntatutakoa desmuntatzea eta berreraikitzea da, horretarako hainbat bitarteko erabilita: argazkia, pintura, eskultura edo performancea». Bidean, gainera, sekulako lagunak izan dituzte, Iñaki Gracenea, Naia del Castillo, Maider López, Manu Muniategiandikoetxea, Jorge Rubio eta Elssie Ansareo artistek diseinatu eta dinamizatu baitituzte tailerrak.

Gipuzkoarren ekarpenei dagokienez, Eibarko Amaña ikastetxeko 6. mailako ikasleek, «haien sen kritikoa garatzeko helburuarekin, eskuragarri dituzten komunikazio-sistema anitzak esploratu dituzte: ahozko hizkuntza, trafiko seinaleak, kode nautikoa, zeinu-hizkuntza…» Manu Muniategiandikoetxea artistaren laguntzaz, inguruari, kartelei, seinaleei eta oso bestelakoak diren kodeei argazkiak atera dizkiete. Horrela, «tipologiak identifikatu eta komunikazio kode berriak eta dibertigarriak asmatu dituzte, aurretik existitzen diren elementuak berrantolatuta».

Gorputzak baliatuz markatu dute kirol zelaia Ondarretako ikasleek.
Gorputzak baliatuz markatu dute kirol zelaia Ondarretako ikasleek.

Andoaingo Ondarreta ikastetxeko 2. mailako ikasleek inguruarekin eta ikaskideekin harremanetan egoten ikasi dute. Egiaztatu dute «haien gorputzak baliatuz espazioak bete ditzaketela elkarlanean, norbanako bakoitza behar duen osotasun baten parte izateraino». Maider Lopez artistarekin Museoa bisitatu dute haurrek, eta Esther Ferrer artistak aulkiekin egindako instalazioak erakarri du haien arreta; inspirazio iturri hori baliatuta, ikasgelaren antolamendua aldatzera jolastu dira: «aulki eta mahaiak beste era batera ipini, eta ezusteko espazioak okupatu dituzte, lankidetza eta talde lana oinarritzat hartuta».

Temas

Euskera

Contenido Patrocinado

Fotos

Vídeos