EHUk 30 lan berri eramango ditu Durangora

Eremu akademikoko liburuekin batera, interes orokorrekoak ere eraman ohi ditu EHUk Azokara./FELIX MORQUECHO
Eremu akademikoko liburuekin batera, interes orokorrekoak ere eraman ohi ditu EHUk Azokara. / FELIX MORQUECHO

Azken urtean euskaraz argitaratu dituen jakintzaren arlo guztietako liburuak aurkeztuko ditu bertan

Euskal Herriko Unibertsitatea (EHU) Durangoko Azokan izango da aurten ere, "euskara sustatzeko daukan konpromisoari eutsiz", eta azken urtean euskaraz argitaratu dituen 30 lan berri baino gehiago eramango ditu abenduaren 6tik 10era bitartean ospatuko den 52. ediziora.

EHUko Argitalpen Zerbitzuak jakintzaren arlo guztietako euskarazko liburuak aurkeztuko ditu han. Hain zuzen, ikasleentzat eta unibertsitatetik kanpoko jendearentzat erakargarri diren ikasliburu teknikoek eta dibulgazioko lanek osatuko dute unibertsitatearen argitalpen uzta.

Horrela, EHUk jakinarazi duenez, Durangoko Azokan izango diren lanen artean daude Iratxe Retolazaren 'Egungo euskal komikiaren historia', Haritz Monrealen 'Mendi literatura', Iñaki Zabaletaren 'Wilhelm von Humboldt eta Euskal Herria', Itxaso Martinen 'Eromena, azpimemoria eta isiltasuna(k) idazten' edo Luzia Alberroren 'Bertsolarien ahoz. Modernizazio prozesua eta identitate bideak Gipuzkoan, 1830-1936'.

Halaber, hainbat urtetako bideari jarraituz, EHUk euskarara itzuli ditu irakaskuntzarako garrantzitsuak izango diren beste hizkuntzetako sona handiko lau testuliburu: 'Nazioarteko Harremanak zer diren', Chris Brown eta Kirsten Ainley egileena; 'Munduaren eskualde geografia', Blanca Azcárate, Mª Victoria Azcárate eta José Sánchez-ena; 'Antzinateko greziar munduaren historia politikoa', Marie-Françoise Baslez irakaslearena, eta 'Aljebra lineala ondo egina', Sheldon Axler egilearena.

Halaber, bi osasun gida ere itzuli dira: 'Botikak bide parenteraletik emateko gida praktikoa', Sendoa Ballesteros eta Irrintzi Fernandez irakasleena, eta '2 motako diabetesa kudeatzeko gida praktikoa', Jose Contreras irakasleak beste batzuekin batera eginiko lana.

Bederatzui eskuliburu

Horrez gain, euskaraz sortutako bederatzi eskuliburu argitaratu ditu paperean EHUk, eta bildumen atalean, filosofiako testu klasikoak jasotzen dituen 'Limes' bilduman, 'Saio politiko eta ekonomiko hautatuak' titulupean, David Hume pentsalari eskoziarraren testuak argitaratu dira, eta 'Legeak-Leyes' bilduman, 'Ikus-entzunezko Komunikazioari buruzko Lege Orokorra', Maria Nieves Arreseren ardurapean.

EHUk 52. Durangoko Azokara eramango dituen beste lan batzuk dira Juan Garziaren 'Esaldiak josten', Luis Miguel Martinezen '7.000 urte harriz eraikitzen Araban', Lekeitioko Zine Bilerari buruzko 'Euskal zinema bideo bilera. 40 urte zinea eta euskara bultzatzen', Maider Uriarteren 'Paisaia-ikuspegia eta haren lau dimentsioak' edota Amaia Ituarte eta Alfonso Apellanizen 'Arrantza-sektoreko langileen arrisku-faktore psikosozialen hastapenak'.

Omenaldien artean, 'Gotzon Aurrekoetxea lagunarterik hara' eta 'Mikel Laboa. Omenaldia' daude. Azkenik, bere euskarazko aldizkarietako azken zenbakiak ere eramango ditu EHUK Durangora: 'Ekaia' (zientzia eta teknologia) aldizkariaren ale arruntak eta 'Potentzia-elektronika: teknologia eta aplikazioak' zenbaki berezia, 'Tantak' (hezkuntza) eta 'Gogoa' (diziplina anitzekoa), baita 'ASJU' (euskal filologia) aldizkari eleaniztuna ere. Berrikuntza horiez gain, bisitariek beste 200 titulu ere izango dituzte aukeran.

Temas

Euskera

Contenido Patrocinado

Fotos

Vídeos