Durangorako agendak prestatzen hasteko garaia

Iazko azokan areto nagusietan egin zen solasaldietako bat. Juan Luis Zabala idazlea izan zuten solaskideek gidari./FELIX MORQUECHO
Iazko azokan areto nagusietan egin zen solasaldietako bat. Juan Luis Zabala idazlea izan zuten solaskideek gidari. / FELIX MORQUECHO

Gune gehienek itxita edo ixtear dute Azokaren 52. edizioaren baitan abenduaren 6tik 10era bitartean egingo duten eskaintza

Durangoko Azoka Landakoko kaleetan disko, liburu eta bestelako kultur produktuen artean gora eta behera ibiltzea baino gehiago da aspaldian. Behaketa- eta erosketa-esperientzien osagarri, Azokaren bihotza izaten jarraitzen duen Landakoren inguruan -barruan ere bai, zenbait kasutan- adin eta interes gehienen araberako guneak joan dira sortzen azken urteetan. Horietan parte hartzeko proposamenak aurkezteko epea urriaren 31an itxi zenez, gune horiek itxi dute, edo ixtear dira, Azokaren egunetan izango dute programazioa. Bisitariak, hortaz, badu honezkero informazioa egun horietarako agenda prestatzen hasteko. Egitarauak itxi ahala, gehiago iritsiko zaio hurrengo egunetan.

Aurten bada urte berezia biziko duen gune bat, hamargarrena beteko duen Ahotsenea. Prest du egitaraua Landako alboko kokapenari eutsiko dion sortzaileen plazak. 70 musikari eta musika taldek aurkeztuko dituzten euren lanak, eta Landako barruko solasaldien gunean 50 sortzailetik gora ariko dira, formatu desberdinetan (solasaldiak, errezitandiak, mahainguruak, akustikoak...). 12 zita proposatuko dira egunean. Kanpoko karpako bi eszenatokietan, berriz, 14 kontzertu eskainiko dira egunero. Rock soinuak nagusi izango dira, baina denetarik entzin ahal izango da, ohi bezala.

Rocka izango da halaber nagusi kontzertu handien plaza izan ohi den Plateruena Kafe Antzokian. Abenduaren 6tik 10era, izen handiko taldeak igoko dira oholtzara gauero. Arrasateko Governors taldeak emango dio hasiera kontzertu-maratoiari, bosgarrena duen 'Z.E.R.O.' lan berria aurkeztuz.

Bigarren gaueko gonbidatuak ere arrasatearrak izango dira, Arkada Social taldeak 'Eromena besarkatzen' diska aurkeztuko baitu. Lehen aldiz, boskoteak euskara hutsez argitaratuko du disko bat eta Azokan izango da, Maukarekin. Abenduaren 8an, Audience talde gernikarraren txanda helduko da. Isilune luze baten ostean, taldeak 'Isla' lan berria aurkeztuko du.

Amaiarearen bezperan, talde handi-handi bat: Glaukoma 'Kalima' lan berriarekin helduko da Azokako bazterrak nahastera, 'Zure kaiola' singlearekin arrakasta lortu ostean.

Kontzertu guztietan, Plateruenako ateak 22:30ean zabalduko dira, eta zuzenekoa 23:00etan hasiko da. Sarrerak hemen eros daitezke. Azken egunerako ez da sarrerarik erosi bihar, debaldeko sarrera izango baitute abenduaren 10erako prestatu dituzten bi kontzertuek: eguerdiko 13:00etan Zezek Plateruena girotuko du, eta 20:00etan Jabier Muguruzaren kontzertuak azokako egitaraua biribilduko du.

Horrez gain, Azoka hasi aurretik, bezperan, gau oso berezia antolatu du Plateruenak. Abenduaren 5ean, 21:30etik aurrera, EHZ Euskal Herria Zuzenean jaialdiaren aldeko sostengu gaua egongo da. Honako taldeek parte hartuko dute: Sorotan Babies, Sermond´s, MICE eta Pelax.

Temas

Euskera

Fotos

Vídeos