Durangoko Azokak erakusmahaia alokatzeko epea zabalik du

Muntaketa lanak egiten, Durangoko Azokan/Morquecho
Muntaketa lanak egiten, Durangoko Azokan / Morquecho

Bere produktuak Durangoko Azokan izan nahi dituenak kontratatu ahal ditu jada erakusmahaiak. Ikasle eguneko tailerretan izen emateko epea ere ireki dute

DVDonostia

Durangoko Azokako 52. edizioak erakusmahaiak alokatzeko epea zabaldu du eta parte hartu nahi duten argitaletxe, diskoetxe, ekoiztetxe, elkarte, erakunde, banatzaile eta autoekoizleek www.durangokoazoka.eus atarian egin ahal izango dute eskaria, irailaren 30era bitartean. Aurtengo edizioa abenduaren 6tik 10era antolatuko da; hirugarren urtez jarraian, bost eguneko Durangoko Azoka izango da.

Antolatzaileek jakinarazi dutenez, bere produktuak Durangoko Azokan izan nahi dituenak, hainbat aukera ditu. Araudian jasotako irizpideen arabera -Azokaren webgunean ikusgai-, interesatuak erakusmahai osoa, erdia edota hainbat partaiderekin batera partekatutako autoekoizpenen gunea kontratatu ahal izango ditu.

Eskaera on line egingo da Durangoko Azokaren web orrian. Aurretik parte hartu dutenek beren erabiltzaile izenarekin egin beharko dute; aldiz, lehenengo aldiz Azokara doazenek beren burua erregistratu beharko dute lehenbizi "expositore" gisa. Stand mota hurrengo urratsetan aukeratu beharko da.

Autoekoizleen guneari dagokionez, behin izen-ematea amaituta, eremua nola partekatu adosteko bilera bat antolatuko da (espazioaren dekorazioa, txandak eta abar).

Gainera, Gerediaga Elkarteak Durangaldeko sortzaile, elkarte eta erakundeei inolako kosturik gabe Durangoko Azokan beren produktuak erakusgai eta salgai jartzeko aukera ematen die. Azokaren araudi nagusia betetzeaz gain, helbide fiskala Durangaldeko udalerriren baten izan behar du eskatzaileak. Produktu guztiak "Durangaldeko argitalpenak" bezala erakutsiko dira, eta izena emateko Gerediaga Elkartera jo behar da.

Bestalde, sortzaileek urriaren 4tik aurrera eman ahal izango dute izena Durangoko Azokako gune ezberdinetan, beren lanak bertan zuzenean aurkezteko.

Ikasle eguna

Halaber, egutegiak bultzatuta, aurten Ikasle Eguna ez da Azokako lehenengo egunean antolatuko, eta bigarren egunean ospatuko da, abenduaren 7an; ikastetxeetako ikasleek lehentasuna izango dute tailer horietan parte hartzeko. Irailaren 19an zabalduko da epea ikastetxeentzat, eta horren ostean epea luzatuko da aisialdi taldeetako parte hartzaileentzat.

Azkenik, Durangoko Azokako antolatzaileek jakinarazi dute 52. edizioan boluntario izan nahi dutenek izena emateko epea urrian hasiko dela.

Temas

Euskera

Fotos

Vídeos