Diario Vasco

'Gernika' filmaren aurrestreinaldia

'Gernika' filmako aktore nagusiak.
'Gernika' filmako aktore nagusiak. / EFE
  • Koldo Serrak zuzenduriko pelikularen aurkezpena gaur izango da Bilbon

Koldo Serrak zuzenduriko 'Gernika' filmaren aurrestreinaldia izango da asteazken honetan Guggenheim Bilbao Museoan, 20:30etik aurrera. María Valverde, James d'Arcy eta Barbara Goenaga protagonista dituen pelikula 2015eko maiatzean eta ekainean filmatu zen Bilbon eta Bizkaiko beste zenbait tokitan, eta Gernikaren bonbardaketa kontatzen du.

Aurrestreinaldiak filmaren zuzendaria, protagonistak eta talde artistiko eta teknikoko ordezkari ugari egongo dira, bai eta herri erakundeetako ordezkari asko ere, hala nola Iñigo Urkullu Eusko Jaurlaritzako lehendakaria, Unai Rementeria Bizkaiko ahaldun nagusia eta Juan Mari Aburto Bilboko alkatea.

Bilboko Udaleko iturriek adierazi dutenez, Koldo Serra bilbotarrak zuzendutako bigarren film luzea da 'Gernika'. Drama erromantiko eta emozional bat kontatzen du, Euskadiko historiaren gertakari tragikoenetariko baten testuinguruan: 1937. urtean Gernikan izandako bonbardaketa.

Filma grabatzean bi milioi euroko eragina sortu da Euskadi osoan, aurretiko ekoizpen eta grabaketa faseetan 750 enplegu sortu ziren eta sektore oso ezberdinetako Bizkaiko enpresak kontratatu zituzten. Pelikularen eszenak Bizkaiko hainbat lekutan filmatu ziren, besteak beste, Bilbon, Gernikan, Gaztelugatxeko Donienen, Diman, Lekeition eta Barakaldon. Bizkaitik kanpo, Araba eta Gipuzkoako zenbait lekutan ere filmatu dute.